Áskerde júrip, múgedek bolyp qalǵan sarbazdy Ulttyq ulannyń qolbasshylyǵy shet elde emdetpekshi

ASTANA. KAZINFORM – Áskerde júrip, bas jaraqatyn alǵan qatardaǵy jaýynger Erbaıan Muhtar 6 aıdan beri komada jatyr. Búgin QR ІІM Ulttyq ulanynyń baspasóz qyzmeti sarbazdyń densaýlyǵyna qatysty resmı aqparat berdi.  

Ulttyq ulannyń habarlaýynsha, qatardaǵy Erbaıan Muhtardyń bas jaraqatyn alý faktisi boıynsha QR QK 440-baby 4-tarmaǵynyń 3-bóligine saı qylmystyq is qozǵalǵan. Bul jerde áskerı qyzmetshiler arasyndaǵy ózara qarym-qatynastardyń jarǵylyq erejelerin buza otyryp, densaýlyqqa aýyr zııan keltirgeni másele bolyp otyr.

«Qazirgi ýaqytta barlyq qajetti saraptamalar taǵaıyndaldy. Sotqa deıingi tergeý jalǵasyp jatyr. Tergeý barysy QR ІІM ÁTD basshylyǵynyń baqylaýynda. Qatardaǵy jaýynger E.Muhtardyń ata-anasynyń talaby boıynsha ońaltý em-sharalary aıaqtalǵannan keıin úıine shyǵarylǵanyn habarlaımyz. Sonymen qatar, Densaýlyq saqtaý mınıstrliginiń emdeý mekemesi QR ІІM Ulttyq ulanynyń áskerı-medıtsınalyq basqarmasymen birlesip oǵan múgedektikti resimdeý boıynsha kómek kórsetedi», — delingen habarlamada. 

Budan bólek, QR ІІM Ulttyq ulanynyń Bas qolbasshylyǵy Reseı Federatsııasynyń V. M. Behtereva atyndaǵy psıhıatrııa jáne nevrologııa Ulttyq medıtsınalyq zertteý ortalyǵyna, S. M. Kırov atyndaǵy Áskerı-medıtsınalyq Akademııasyna jáne Professor A. L. Polenov atyndaǵy Reseı ǵylymı-zertteý neırohırýrgııalyq ınstıtýtyna, sondaı-aq konsýltatsııalyq kómek berý jáne aýrýhanaǵa jatqyzý máselesin qarastyrý úshin Túrkııa elshiligine hat joldaǵany belgili boldy. 

Eske sala keteıik, buǵan deıin Jambyl oblysy Otar aýylynda áskerde júrip komaǵa túsken 19 jastaǵy sarbaz aýrýhanadan shyqqanyn jazǵan bolatynbyz. 

Al, búgin áskerge óz erkimen baryp, múgedek bolyp qalǵan sarbazdyń týystary halyqtan kómek suraǵanyn birqatar BAQ jazǵan bolatyn.