Áskerde júrip múgedek bolyp qalǵan Erbaıan Muhtar elge oraldy
ASTANA. KAZINFORM – Áskerde júrip basynan aýyr jaraqat alǵan Erbaıan Muhtar Stambulda eminiń alǵashqy kezeńin aıaqtap, Astanaǵa oraldy. Bul týraly quqyqqorǵaýshy Inga Imanbaı jazdy.
Zańgerdiń sózinshe, Erbaıan endi 2-3 aı elde bolyp, aǵzasyn tolyq qalpyna keltirgennen keıin kóktemde Túrkııaǵa qaıta oralyp, eminiń ekinshi kezeńin bastamaq. Ol Astanada neırohırýrg professor Gekhan Akdemırdiń baqylaýynda bolady dep kútilip otyr. Bir aıdan keıin dáriger ózi Qazaqstanǵa kelip, Erbaıannyń jaǵdaıyn tekseretin bolady.
— Erbaıannyń Stambuldaǵy emin uıymdastyryp, barynsha qoldaý kórsetken Dınara men Redjep esimdi azamattarǵa da alǵys aıtylǵan. Sonymen qatar, onyń ata-anasy emniń alǵashqy kezeńine ketken qarajat boıynsha jaqyn arada esep beredi, — dep jazdy ol.
Eske sala keteıik, Erbaıan áskerge óz erkimen baryp, birneshe aıdan keıin Almatydaǵy 5571 áskerı bóliminde bas súıek-mı jaraqatyn alǵan bolatyn.
Qatardaǵy jaýynger Erbaıan Muhtar 6 aıdan beri komada jatqanyn jazǵan bolatynbyz.
Ulttyq ulan bólimshesinde merzimdi áskerı qyzmet atqarǵan Erbaıan Muhtardyń komaǵa túsýine janama aýrýlar sebep bolǵanyn áskerı mamandar málimdegen bolatyn. Alaıda, osy tusta Erbaıannyń ata-anasy bul tujyrymmen kelispeıtinderin habarlaǵan edi.