Áskerde júrip komaǵa túsken Erbaıan Muhtardy Qazaqstan medıtsınasy aıaqqa turǵyza ala ma – mınıstr jaýaby

ASTANA. KAZINFORM – Densaýlyq saqtaý mınıstri Aqmaral Álnazarova Úkimet otyrysynan keıin ótken baspasóz máslıhatynda áskerde júrip komaǵa túsken Ulttyq ulan sarbazy Erbaıan Muhtardyń jaǵdaıy týraly pikir bildirdi.

- Jaǵdaıy turaqty. Qosymsha ońaltý-medıtsınalyq qyzmetterdi alý qajet bolǵanyna baılanysty kúni keshe Erbaıandy Ulttyq medıtsınalyq ortalyǵyna jatqyzdyq. Qasynda ákesi bar. Aýrýyna baılanysty tıisti kómekti alyp jatyr, - dedi Aqmaral Álnazarova.

Jýrnalıst Qazaqstan medıtsınasy jas jigitti aıaqqa turǵyzýǵa qanshalyqty qaýqarly ekenin surady.

- Búgingi tańda onyń dıagnozy óte qıyn. Jaraqatpen birge ınfektsııanyń bolǵanyn aıta ketýimiz kerek. Sondyqtan tıisti jumystar júrip jatyr. Túrkııaǵa da baryp keldi. Qazir ózimiz qosymsha qarap jatyrmyz. Qajet bolsa, Túrkııaǵa bola ma, basqa memleket bola ma, baryp emdelýge kómek kórsetý máselesin, uıymdastyrý jumystaryn ata-anasymen talqyladyq. Olar Qazaqstanda em alýǵa kelisimderin berdi. Aldyn ala boljam jasamaı-aq, qajetti kómektiń tolyq berilip jatqanyn málimdeımin, - dedi vedomstvo basshysy.

Eske salsaq, áskerde júrip, basynan jaraqat alǵan Ulttyq ulannyń qatardaǵy jaýyngeri Erbaıan Muhtar birneshe aı boıy komada jatqan bolatyn.

Jyl basynda ol Ystanbuldaǵy eminiń alǵashqy kezeńin aıaqtap, Astanaǵa oralǵan.