Áskerde jaǵy synǵan sarbazdyń jaǵdaıy belgili boldy

ASTANA. KAZINFORM — Otardaǵy áskerı bólimde soqqyǵa jyǵylyp, aýyr jaraqat alǵan jaýynger saýyǵyp keledi. Bul jóninde Qorǵanys mınıstrliginiń áskerı-klınıkalyq gospıtali jaqsúıek-bet hırýrgııasy bólimshesiniń basshysy Vladıslav Mýsatov málimdedi.

— Naýqas qazir ońaltý kezeńinde. Dárýmender qabyldap, fızıologııalyq emdeýden jáne emdik dene tárbıesinen (LFK) ótip jatyr. Búgingi medıtsınalyq tekserý barysynda aýzy 3 santımetrge ashylatyny anyqtaldy. Demek, jaǵdaıy jaqsarǵan. Aldaǵy ýaqytta gıperbarııalyq oksıgenatsııa seanstaryn ótkizý josparda bar. Odan ári emdik dene tárbıesi ońaltýyn aıaqtap, áskerı-medıtsınalyq komıssııa taǵaıyndaımyz, — dedi dáriger.

Sondaı-aq, Qorǵanys mınıstrliginiń baspasóz qyzmeti sarbazdyń ózinen de suhbat alyp, vıdeosyn bólisken edi. Onda ol ózin jaqsy sezinetinin aıtady.

— Osynda kelgen soń, aýzymdy qarap, tekserdi. Jumsaq rezińke salyp berdi. Ekpe salyp, kók tamyrǵa ınektsııa jasap, tolyqtaı jaqsy qarap jatyr. Fızıologııalyq emdeýden ótip júrmin. Aýzymdy ashyp sóıleı alamyn, tamaq ishemin, — dedi sarbaz.

Eske salaıyq, buǵan deıin taratqan aqparatta osy jaıtqa qatysty qylmystyq is qozǵalyp, qazir tergeý júrip jatqanyn jazǵanbyz.