Áskerde jaǵy synǵan sarbaz tolyq aıyǵa ma — DSM jaýaby
ASTANA. KAZINFORM — Jaǵy synǵan azamat jaraqatynyń zardabyn uzaq ýaqyt tartýy múmkin. Bul jóninde QR Densaýlyq saqtaý mınıstrligi málimdedi.
Atalǵan mınıstrlikke Otardaǵy áskerı bólimde jaǵy synǵan sarbaz Esbol Qapardyń jaraqaty jáne emdelý barysy jóninde saýal joldaǵan edik.
— «Halyq densaýlyǵy jáne densaýlyq saqtaý júıesi týraly» QR Kodeksiniń 273-babyna sáıkes, patsıent týraly málimet medıtsınalyq qyzmetker saqtaýy tıis qupııaǵa jatady jáne bul qupııa zańmen qorǵalady, — delingen resmı jaýapta.
QR DSM dál Esbol Qaparǵa qatysty pikir bildirmese de, jaq synýdyń saldary qandaı bolatyny jóninde jalpylama málimet berdi.
Adamnyń jaǵy synǵan soń, zaqymdaný dárejesine baılanysty tisteý qabiletiniń buzylýy, aýyzdy ashýdyń shektelýi, tamaq jeýdiń qıyndaýy, ıek pen tómengi erin aımaǵynda sezimtaldyqtyń ýaqytsha buzylýy tárizdi zardaptary baıqalýy múmkin. Sondaı-aq, bet súıeginiń synýy men mıdyń shaıqalýy qatar bolýy yqtımal.
— Jaq synyp, ota jasatqannan keıin naýqas jaq súıek-bet hırýrginiń baqylaýynda bolýy kerek. Aýyz qýysyna salynǵan shınany túzetý, aýyz qýysynyń gıgıenasyn saqtaý asa mańyzdy. Qalpyna kelý merzimi orta eseppen 2 aıǵa deıin sozylady, — delingen resmı habarlamada.
Sonymen birge, tıisti em-domdy ýaqytyly qabyldaǵan jaǵdaıda tómengi jaq súıeginiń súıekteri tolyqtaı aıyǵyp, qalpyna keledi.
Otardaǵy áskerı bólimde soqqyǵa jyǵylyp, jaǵy synǵan jaýynger Esbol Qapardyń áskerge qaıtyp oralý-oralmaýyn arnaıy komıssııa sheshedi. Bul jóninde QR Qorǵanys mınıstrligi málimdedi.
Atalǵan mınıstrlikke jaraqat alǵan sarbazdyń qazirgi jaǵdaıy jáne istiń tergeý barysy jóninde saýal joldaǵan edik.
— Aýrýhanaǵa jatqyzylǵannan keıin emdeý tolyq kólemde júrgizilýde jáne dárigerlerdiń turaqty baqylaýynda. Búginde oń dınamıka baıqalady: psıhologııalyq jaǵdaıy turaqty, shaınaý jáne aýyzdy ashý fýnktsııalary jaqsaryp keledi. Jaqyn arada bekitkish shınalar alyndy. Qazirgi ýaqytta ol óz betinshe tamaq ishe alady, — delingen resmı jaýapta.
E. Qapar áli de fızıoterapııa, dárýmendik em jáne jalpy nyǵaıtatyn em qabyldap, emdik dene shynyqtyrý sabaqtarynan ótip jatyr. Sondaı-aq gıperbarııalyq oksıgenatsııa seanstary josparlanǵan.
— Emdeý kýrsy aıaqtalǵannan keıin komandırdiń sheshimimen oǵan qosymsha ońaltý demalysy beriledi. Budan soń áskerı-dárigerlik komıssııa onyń aldaǵy áskerı qyzmetke jaramdylyq dárejesin aıqyndaıdy. Tolyq saýyǵyp shyqqan jaǵdaıda ol áskerı qyzmetin ári qaraı jalǵastyrady, — delingen resmı habarlamada.
Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi.
Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.
Sonymen qatar, buǵan deıin Otardaǵy áskerı bólimde jaǵy synǵan sarbazdyń jaǵdaıy týraly jazǵan edik.
Adam quqyqtary jónindegi ýákil Otarda jaǵy synǵan sarbazǵa qatysty pikir bildirdi.
Qorǵanys mınıstrliginiń baspasóz qyzmeti osy oqıǵaǵa baılanysty úsh komandır men orynbasary qyzmetinen bosatylǵanyn málim etti.
Al kúdikti retinde jábirlenýshiniń boryshtasy aıyptalyp, ústinen qylmystyq is qozǵalǵanyn habarlaǵan edik.