Áskerde jaǵy synǵan sarbaz basqa bólimge aýystyryldy
ASTANA. KAZINFORM — Otardaǵy áskerı bólimde jaýyngerlik boryshyn ótep júrgende, soqqyǵa jyǵylyp, jaǵy synǵan sarbaz Esbol Qapar áskerı gospıtalde áli de em qabyldap jatyr. Bul jóninde QR Qorǵanys mınıstrligi resmı saýalymyzǵa bergen jaýabynda málimdedi.
— Merzimdi qyzmettegi qatardaǵy jaýynger E. Qapar qazirgi ýaqytta Gvardeıskıı kentindegi áskerı gospıtalda statsıonarlyq em qabyldap jatyr. Oǵan qajetti medıtsınalyq kómek tolyq kólemde kórsetilip keledi, — delingen habarlamada.
Sonymen birge, áskerı qyzmetshi basqa áskerı bólimge aýystyryldy. Emdeý jáne ońaltý sharalary tolyq aıaqtalǵannan keıin ol áskerı qyzmetin atalǵan bólimde jalǵastyrady.
— Qorǵanys mınıstrligi áskerı qyzmetshilerdiń qaýipsizdigin qamtamasyz etý jáne mundaı jaǵdaılardyń aldyn alý baǵytynda júıeli jumystar júrgizip keledi. Osy maqsatta áskerı bólimderdegi baqylaý kúsheıtilip, tártip pen jeke quramnyń moraldyq-psıhologııalyq ahýaly turaqty nazarda ustalady. Sonymen qatar, áskerı qyzmetshilerdiń quqyqtaryn qorǵaý, psıhologııalyq qoldaý kórsetý jáne quqyqbuzýshylyqtardyń aldyn alý sharalary kezeń-kezeńimen jetildiriledi. Mınıstrlik áskerı ortada zańbuzýshylyqtarǵa jol bermeý qaǵıdatyn qatań ustanady, árbir derek boıynsha tıisti tekserý júrgizilip, zań aıasynda sheshim qabyldanady, — delingen resmı jaýapta.
Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi.
Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.
Qorǵanys mınıstrliginiń baspasóz qyzmeti osy oqıǵaǵa baılanysty úsh komandır men orynbasary qyzmetinen bosatylǵanyn málim etti.
Al kúdikti retinde jábirlenýshiniń boryshtasy aıyptalyp, ústinen qylmystyq is qozǵalǵanyn habarlaǵan edik.
