Áskerı qyzmetshiler ashanasynda «shved ústeli» qaǵıdaty engizilmek
ASTANA. KAZINFORM – Qazaqstan Qarýly kúshterinde áskerı qyzmetshilerdi tamaqtandyrý júıesin jańǵyrtýǵa baǵyttalǵan jańa standarttar engizilip jatyr.
Qorǵanys mınıstrliginiń málimetinshe, jańartýdyń negizgi elementteriniń biri – áskerı qyzmetshilerge birneshe taǵamnyń ishinen tańdaý jasaýǵa múmkindik beretin «shved ústeli» qaǵıdattaryn engizý.
Jańa model boıynsha sarbazdar kún saıyn birneshe túrli birinshi jáne ekinshi taǵamnan óz qalaýy boıynsha tańdaı alady. Bul rette azyq-túlik paıynyń quny ózgermeıdi. Júıe taǵam daıyndaý men taratý protsesterin ońtaılandyrý esebinen iske asyrylady.
Qazirgi ýaqytta áskerdi tamaqtandyrýdy 40 myńnan astam áskerı qyzmetshini qamtıtyn 23 qyzmet kórsetýshi qamtamasyz etedi. Onyń ishinde merzimdi qyzmet sarbazdary, kýrsanttar men kadetter bar. Sonymen qatar konkýrs nátıjesinde 11 jańa jetkizýshi anyqtalǵan.
Tamaqtandyrý júıesi uzaq merzimdi formatqa kóshirilmek. Kelisimsharttar úsh jylǵa jasalyp, konkýrs rásimderi tolyqtaı elektrondyq formatqa aýystyrylady. Bul ashyqtyqty arttyryp, sybaılas jemqorlyq táýekelderin azaıtýǵa múmkindik beredi.
Tamaq sapasyn jaqsartý úshin 300-ge jýyq baqylaý jáne kórsetilimdik taǵam ázirleý rásimi uıymdastyrylyp, aspazdarǵa arnalǵan oqytý sharalary ótkizilgen.
– Biz tamaqtanýdy uıymdastyrýdyń zamanaýı modeline kóshýdemiz. Negizgi nazar áskerı qyzmetshiniń qajettiligine aýdarylady. «Shved ústeli» elementteri taǵamnyń ártúrliligin arttyryp, sarbazdarǵa tańdaý múmkindigin beredi, – dedi Qorǵanys mınıstriniń orynbasary, general-maıor Almaz Jumakeev.
Sondaı-aq áskerı qyzmetshilerdiń pikirleri eskerilip, bólimshelerde anonımdi saýalnamalar júrgizilgen. Nátıjesinde mázir qoldanystaǵy normalardy saqtaı otyryp jańartylǵan.
Jańashyldyq aıasynda ulttyq taǵamdarǵa da basymdyq berilip otyr. Áskerı bólimderde «ulttyq taǵamdar kúni» engizilip, mázirge mampar, qýyrdaq, palaý, et jáne baýyrsaq sııaqty dástúrli as túrleri qosylǵan.
Budan bólek, dalalyq jaǵdaıda tamaq sapasyn arttyrý jáne áskerı aspazdar ınstıtýtyn damytý jumystary qolǵa alynǵan. Aspazdar polıgondarda azamattyq jetkizýshilermen birlesip jumys isteıdi.
Qoǵamdyq baqylaý da kúsheıtilgen. «Analar júregi» sarbaz analary komıteti tamaq sapasyn baǵalaý jáne jeke qurammen ózara is-qımyl jasaý protsesine qatysady.
Vedomstvo ókilderiniń aıtýynsha, qabyldanǵan sharalar áskerı qyzmetshilerdi azyq-túlikpen qamtamasyz etý júıesin sapaly jańa deńgeıge kóterýge baǵyttalǵan.
Aıta keteıik, buǵan deıin áskerge shaqyrylýshylardy irikteý qalaı júrgizilip jatqany habarlandy.
