Áskerde sarbazdyń sýıtsıdke barýyna ne sebep – mınıstrlik jaýaby

NUR-SULTAN. QazAqparat – Áskerde jas sarbazdardyń óz-ózine qol salýyna ne sebep? QR Qorǵanys mınıstrligi atalǵan máselege qatysty túsinikteme berdi, dep habarlaıdy QazAqparat tilshisi.

«Sarbazdardyń óz-ózine qol salýynyń sebebi tárbıege (bala kúninde psıhıkalyq jaraqat alýy – 5 jasqa deıin), tuqym qýalaıtyn beıimdilikke (otbasynda osyndaı jaǵdaıdyń bolýy) jáne áskerı mindetin óteýshiniń jeke psıhologııalyq erekshelikterine baılanysty bolýy múmkin. Ómirde osyndaı kúızeliske ákeletin keı jaǵdaılarǵa toqtalyp ótsek:

- dos bolyp júrgen qyzynyń tastap ketýi;

- ártúrli sebepterge baılanysty oryn alatyn otbasylyq janjaldar;

- ózine-ózi qol jumsaýǵa jeke basynyń beıim bolýy jáne kúızeliske tóze almaýy;

- jaýapkershilikten qorqý;

- emotsııaǵa berilip, oıynyń buzylýy jáne taǵy basqa», - degen jaýap berildi QazAqparat saýalyna.

Sondaı-aq atalǵan vedomstvo armııa sapyna jas arbazdar ómirge kózqarasy tolyq qalyptaspaǵan kezde shaqyrylatynyn aıtyp ótti.

«Sonymen qatar áskerge dúnıetanymy, tárbıesi jáne ómirge degen kózqarasy tolyq qalyptaspaǵan jastar shaqyrylady. Odan bólek áskerde, shynyn aıtqanda, pedagogıkalyq turǵydan qaraýsyz qalǵan jas jigitter kezdesedi. Bir jyl ishinde olardy qaıta tárbıeleý qanshalyqty qıyn ekenin oılap kórińiz», - deıdi mınıstrlikten.

Qorǵanys mınıstrliginiń habarlaýynsha, áskerde adamdy joǵaltý orny tolmas qaıǵy.

«Áskerde rýhanı maǵynasy bar jáne erekshe qundylyqqa ıe «jaýynger joldas» degen uǵym bar ekeni kezdeısoq emes. Komandırler de sarbazdardy urys alańynda ǵana emes, beıbit ýaqytta da jattyǵýlar nemese kúndelikti tapsyrmalardy oryndaý kezinde talaı ólimnen alyp qalǵany jaıly mysaldar kóp», - delingen resmı aqparatta.

Buǵan deıin Qorǵanys mınıstrligi áskerde álimjettik máselesi qalaı sheshilip jatqany týraly saýalǵa jaýap bergen edi.

Odan bólek, mınıstrlik jas sarbaz Álibek Qalbaıdyń ólimine qatysty sońǵy málimettermen bólisti.