Áskerde sarbazdardan aqsha jınaý qashan toqtaıdy – mınıstrlik jaýaby

ASTANA. KAZINFORM – Áskerde álimjettik máselesimen qatar sarbazdardan aqsha jınaý problemasy bar bolyp shyqty. Máseleniń mán-jaıyn QR Qarýly kúshteri Qurlyq áskerleri bas qolbasshysynyń birinshi orynbasary – Bas shtab bastyǵy general-maıor Qýanyshbek Úshtaevtan suradyq.

— Bul baǵytta bólim komandırlerimen tyńǵylyqty jumystar júrip jatyr. Árbir sarbaz tamaq, kıimmen qamtylǵan. Biraq, áskerı bólimder aýmaǵynda dúkender bar, al balalar tátti jegisi keledi, onyń ústine qazir uıaly telefon arqyly aýdarym túrleri jumys isteıdi. Bizde kóp quqyqbuzýshylyq bolǵan joq. Endi bir-eki jaǵdaı boldy, ıaǵnı áke-sheshesinen 2000-3000 teńge alyp, óz qajetine jaratqan, — dedi Qýanyshbek Úshtaev ortalyq kommýnıkatsııalar qyzmeti alańynda ótken baspasóz máslıhatynda. 

Odan ári Qorǵanys mınıstrliginiń ókili áskerdegi álimjettik máselesin qozǵady. 

— Bir, eki álimjettik oqıǵalar bolǵan shyǵar, biraq jalpy qarýly kúshterde álimjettik bar degenge kelispeımin. Áskerı qyzmetshiler 100 paıyz mindetiniń 99 paıyzyn oryndap otyr. Álimjettik jaǵdaıy boıynsha tıesili jumystar jasaımyz, - - dep tolyqtyrdy bas shtab bastyǵy.

Aıta ketsek, bir apta buryn Saryózekte (Jetisý oblysy) qatardaǵy jaýynger oqý-jattyǵý kezinde mert boldy. 

Eske sala keteıik, elimizde áskerdegi ólimdi toqtatý úshin zań jobasyn ázirlemek.