Áskerde boı kedergi emes: Abaı garnızonynda boıy 2 metr sarbaz boryshyn ótep júr
ASTANA. KAZINFORM — Abaı garnızonynda elimizdegi eń boıy uzyn sarbazdardyń biri, qatardaǵy jaýynger Ilıa Halchýkov merzimdi áskerı qyzmetin ótep júr. Onyń ómir joly minez, tártip jáne Otanǵa qyzmet etýge degen nıet bolsa, boıdyń standarttan artyq bolýy áskerge kedergi emes ekenin aıqyn kórsetedi.
Ilıa Petropavl qalasynyń týmasy, mamandyǵy — avtokólik jóndeýshi. Áskerge barý týraly sheshimin týystary da qoldaǵan. Otbasynda alyp adamdar joq: ákesiniń boıy — 1 metr 90 santımetr, anasynyń boıy — 1 metr 60 santımetr.
Mundaı antropometrııalyq derekter sırek kezdeskenmen, áskerı qyzmetshi qyzmet jaǵdaıyna tez beıimdelip, jóndeý rotasynda óz mindetterin senimdi atqaryp júr. Ol áskerı tehnıkaǵa tehnıkalyq qyzmet kórsetilýine jáne onyń jaramdy kúıde bolýyna jaýap beredi.
Sarbazdyń aıtýynsha, boıdyń uzyndyǵynyń keı jaǵdaıda, ásirese saptyq daıyndyq pen dene shynyqtyrý normatıvterin oryndaý kezinde paıdasy bar.
— Men árdaıym boıshańdyǵymmen kózge kóp túsem, alaıda ony eshqashan problema dep sanaǵan emespin. Áskerde bastysy syrtqy kelbet emes, tártip, jaýapkershilik jáne áskerı boryshty oryndaýǵa ázir bolý ekenin túsindim. Munda óz ornymdy taptym jáne boryshymdy ótep júrgenime maqtanamyn, — deıdi Ilıa Halchýkov.
Onyń jeke ereksheligin eskergen bólim basshylyǵy da barlyq qajetti jaǵdaıdy jasady. Sarbazǵa áskerı kıim arnaıy ólshemmen tigilip, aıaq kıim jeke tapsyryspen alyndy. Al jatyn orny boıyna saı beıimdeldi. Mundaı jaǵdaı sarbazǵa ózine senimdi bolýǵa jáne qoıylǵan mindetterdi tolyq oryndaýǵa múmkindik beredi. Bul oqıǵa qazirgi zamanǵy armııanyń ár adamnyń ereksheligin eskerip, adamdardy syrtqy pishinine emes, qyzmetke degen kózqarasyna qaraı baǵalaıtynynyń taǵy bir dáleli.
Sonymen qatar Aqtaý garnızonynda boıy 2 metr sarbaz áskerı boryshyn ótep júrgenin jazǵan edik.