Áskerde boryshyn ótep, grant ıelendi: Ulttyq ulan sarbazy stýdent atandy

ASTANA.KAZINFORM -  Ádilhan Serik Ulttyq ulan qataryna merzimdi áskerı qyzmetke shaqyrylǵanda, ásker onyń ómirin túbegeıli ózgertetin alǵashqy qadam bolaryn oılamaǵan edi. Búginde ol – L.N. Gýmılev atyndaǵy Eýrazııa ulttyq ýnıversıtetiniń stýdenti, memlekettik grant ıegeri jáne bir múmkindiktiń tutas taǵdyrdy qalaı ózgerte alatynynyń aıqyn dáleli.

Áskerge shaqyrylmas buryn Ádilhan arnaýly orta bilim alǵan. Kolledjdi támamdaǵan soń ony Qaraǵandydan ásker qataryna shaqyryp, merzimdi qyzmetin elordadaǵy Ulttyq ulannyń 5573 áskerı bóliminde ótedi. Munda ulandyq qoǵamdyq tártipti qamtamasyz etip, shahar kóshelerinde patrýldik qyzmet atqardy.

Qyzmet barysynda ol «Sarbaz 2.0» memlekettik baǵdarlamasy jaıynda bildi. Bul bastama merzimdi áskerı qyzmetshilerge suranysqa ıe mamandyqtar boıynsha tegin oqýǵa múmkindik beredi. Bul jańalyq onyń kópten bergi armanyna jol ashty.

– Grant alý úshin barymdy saldym. Qoǵamdyq pánder boıynsha test tapsyryp, áskerı qyzmette de úzdik bolýǵa tyrystym. Baǵdarlama týraly estigen sátte bul múmkindikti jibermeý keregin túsindim. Grantqa túsý – men úshin de, ata-anam úshin de úlken qýanysh, – deıdi ol.

Ádilhan kópbalaly otbasynda tárbıelengen, úıinde alty bala bar. Sondyqtan baǵdarlama onyń otbasyna da aıtarlyqtaı demeý boldy.

Qazir ol bedeldi oqý ornynda «bıotehnolog» mamandyǵyn meńgerip jatyr. Ata-anasy ulynyń jetistigine qýanyp, onyń bıik belesterdi baǵyndyratynyna senedi.

Ádilhannyń oqıǵasy – bir ǵana mysal emes. Bıyl jazda el boıynsha 900-den astam ulandyq merzimdi qyzmetin aıaqtap, Qazaqstannyń jetekshi joǵary oqý oryndarynda tegin bilim alýǵa múmkindik beretin sertıfıkatqa ıe boldy.

Aıta keteıik, quqyqtyq tártip áskeriniń jeke quramy saqshylarmen birlesip elimizdiń 21 qalasynda qoǵamdyq tártipti qadaǵalaıdy. Bul mindetti atqarýǵa kún saıyn ásker boıynsha 8 000-nan asa ulandyq jumyldyrylady.

Aıta keteıik, Ulttyq ulan ofıtserleriniń qatary 200-ge jýyq túlekpen tolyqty.