Áskerde álimjettik joq — Qorǵanys mınıstri

ASTANA. KAZINFORM — Qorǵanys mınıstri Dáýren Qosanov taıaýda elordada balalary áskerde qaza tapqan analardyń mıtıngine qatysty pikir bildirdi.

— Biz olardy qabyldadyq. Analar mıtıngke shyqqan máseleniń bári tergeý is-sharalaryna qatysty boldy. Tergeýdi Bas áskerı prokýratýranyń baqylaýymen Іshki ister mınıstrligi júrgizip jatyr. Ol jerde bizge qatysy joq máseleler boldy, — dedi Dáýren Qosanov Senattyń jalpy otyrysynan keıin BAQ ókilderiniń saýalyna oraı.

Onyń aıtýynsha, Qorǵanys mınıstrligi áskerdegi tártipti kúsheıtý sharalaryn júzege asyryp jatyr. 

— Komandırlermen, psıhologtermen jumys istep, kameralar ornatyp jatyrmyz. Aıyna 1-2 ret baspasóz qyzmetkerleriniń saparyn uıymdastyrýdamyz. Áskerde álimjettik joq. Biraq, áskerde er-azamattar kóp bolǵannan keıin túrli jaıttar bolady. Bul qoǵamymyzda da bar. Jigit bolǵannan keıin kelispeı, eregesip qalady. Ondaı da bolady. Áskerdi qoǵamnan bólmeńizder. Biz de qoǵamnyń múshesemiz, — dedi mınıstr.

Eske salsaq, osyǵan deıin Mańǵystaý oblysynda sarbaz qaıtys bolǵany habarlandy.

Prezıdent áskerde qaza tapqan sarbazdarǵa qatysty isti tergeý kezinde zańnyń saqtalýyn qadaǵalaýdy tapsyrǵan edi.

Budan buryn Bas prokýror Berik Asylov Bas prokýratýra men Bas áskerı prokýratýra basshylyǵy qaza tapqan jáne jaraqat alǵan áskerı qyzmetshilerdiń analaryn qabyldaıtynyn aıtty.