Ásker jasyndaǵy 50 myń qazaqstandyq shetelde júr — Qorǵanys mınıstrligi

ASTANA. KAZINFORM — Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev ortalyq kommýnıkatsııalar qyzmetinde ótken baspasóz máslıhatynda aýylda muǵalim bolyp júrgen ásker jasyndaǵy azamattar armııaǵa shaqyrýdan bosatylatynyn aıtty. 

— Áskerge shaqyrylatyn azamat oqýda bolsa nemese aýylda muǵalim bolsa, joǵary bilimnen keıin bilim alǵysy kelse, ondaı azamattar áskerden bosatylady. Halyqqa aıtarym, óziniń áskerı boryshy týraly aldyn ala málimet alǵysy kelgender turǵylyqty jerdegi áskerı basqarý organyna kelip nemese GOV-tegi jeke kabınet arqyly áskerı mártebesin bile alady, — dedi Qarýly kúshteri Bas shtabynyń ókili.

Onyń sózinshe áskerge shaqyrý protsesin tsıfrlandyrý kóleńkedegi azamattardy jaryqqa shyǵarǵan.

— Áskerge shaqyrý protsesin tsıfrlandyrý bizge ne berdi? Qazaqstandyqtar JSN alǵannan keıin shetelge ketse de, tsıfrlyq júıede izin kórip otyramyz. 2023 jyly áskerge shaqyrýǵa jatatyn 120 azamat bolsa, tsıfrlandyrý júrgizilgennen keıin qosymsha 50 myń jas qosyldy. Sebebi 50 myńǵa jýyq azamatymyz shetel asyp, basqa jaqta júr, — dedi Farhat Aıdarbaev.

Sondaı-aq, ol áskerden jaltarǵandar 1 jyl sottalýy múmkin ekenin eskertti.