Ásker tarıhyndaǵy erekshe oqıǵa: Shymkentte bir bólimde 12 synyptas sarbaz boryshyn ótep júr
ShYMKENT. KAZINFORM — Elimizdegi áskerı bólimder tarıhynda erekshe jaǵdaı tirkeldi. Qysqy áskerı shaqyrtý kezinde bir bólimge bir mezette bir synypta bilim alǵan 12 jas sarbaz alynǵan.
Sarbazdar — Almaty oblysy, Jambyl aýdanyna qarasty Úmbetáli Káribaev atyndaǵy orta mekteptiń túlekteri. Keshe ǵana bir partada otyryp, bilim alǵan synyptastar búginde Qazaqstan Respýblıkasy ІІM Ulttyq ulanynyń Shymkent qalasynda ornalasqan 6506 áskerı bóliminde bir saptan tabylǵan.
— Men áskerge jalǵyz kelgen joqpyn. Biz 12 synyptas bolyp otan qorǵaýshylar qataryn tolyqtyrdyq. Mektep kezinen bastap bizdiń boıymyzda áskerge degen qyzyǵýshylyq boldy. Ózara kelisip, otan aldyndaǵy azamattyq boryshymyzdy Ulttyq ulan sapynda birge óteımiz dep sheshtik, — deıdi qatardaǵy jaýynger Rasýl Saýtov.
Ulttyq ulan baspasóz qyzmetiniń málimetinshe, qazirgi tańda jas sarbazdar oqý bóliminde bastapqy áskerı daıyndyqtan ótip, áskerı qyzmettiń qyr-syryn meńgerip júr. Bólim komandırleri synyptastardyń uıymshyldyǵy men ózara qoldaýyna tánti eken.
— Biz Otanymyzdy qorǵaý úshin birge turǵanymyzdy maqtan etemiz. Munda biz bir-birimizdi mekteptegideı qoldaımyz. Osyndaı birlik áskerı ómirge tez beıimdelýge kómektesedi, — deıdi qatardaǵy jaýynger Marat Beıbarys.
Aıta keteıik, buǵan deıin elimizde áskerı mázirde ratsıon jańartylyp, tamaqtyń quny men kalorııasy artqany týraly jazǵan edik.
Arýjan Armanqyzy