Ásker men tehnologııa toǵysqan joba: «SARBAZ+» qalaı iske asyp jatyr
ASTANA. KAZINFORM — Qazaqstan Respýblıkasynyń Qarýly Kúshterinde merzimdi áskerı qyzmettiń jańa formaty — «SARBAZ+» jobasy engizilip jatyr. Joba tsıfrlyq quzyretterdi damytýǵa, adamı kapıtaldy nyǵaıtýǵa jáne jeke quramnyń qaýipsizdik deńgeıin arttyrýǵa baǵyttalǵan.
Jobanyń pılottyq alańy retinde Almaty oblysyndaǵy 78460 áskerı bólimi tańdaldy. «SARBAZ+» merzimdi áskerı qyzmetke degen kózqarasty transformatsııalaý aıasynda júzege asyrylyp, sarbazdardy daıarlaýdyń neǵurlym sanaly ári damýǵa baǵyttalǵan júıesin kózdeıdi.
Negizgi jańashyldyqtardyń biri — myarmy.kz tsıfrlyq platformasy arqyly merzimdi áskerı qyzmetke konkýrstyq irikteýdiń engizilýi. Pılottyq joba aıasynda 268 ótinim túsip, olardyń ishinen 90 úmitker irikteldi. Ótken senbide jas sarbazdar týǵan-týystary men jaqyndarynyń qatysýymen áskerı ant qabyldady. Qazirgi ýaqytta joba 78460 áskerı bóliminde tolyq iske asyrylyp, ony aýqymdy túrde engizý josparlanyp otyr.
Kúzgi áskerge shaqyrý kezeńinde Eltex, Rtel jáne Ashyk Aspan kompanııalarynyń qatysýymen áskerı bólim bazasynda radıobaılanys, jelilik tehnologııalar jáne ushqyshsyz ushý apparattaryn basqarý salalary boıynsha mamandar daıarlaıtyn oqý synyptary ashyldy. Astana Hub-pen birlesip TechOrda baǵdarlamasy aıasynda aqparattyq qaýipsizdik, derekterdi qorǵaý jáne jasandy ıntellekt tehnologııalaryn qoldana otyryp drondardy baǵdarlamalaý baǵyttary boıynsha oqytý uıymdastyryldy. Sonymen qatar, áskerı qyzmetshiler QLANG platformasynda aǵylshyn tilin onlaın formatta meńgerýde.
Jaýyngerlik daıyndyqtyń sapasyn arttyrý maqsatynda zamanaýı elektrondy tır ashyldy. Sporttyq ınfraqurylym aıtarlyqtaı jańartylyp, fýtbol alańy qaıta jóndeýden ótti, streetball jáne workout alańdary jabdyqtaldy, jattyǵý zaly ashyldy.
Qaýipsizdik deńgeıin arttyrý úshin avtomattandyrylǵan jaǵdaı monıtorıngin qamtamasyz etetin beıneanalıtıka júıesi engizildi. Intellektýaldyq jáne moraldyq-psıhologııalyq damýǵa baǵyttalǵan shahmat sektsııalary jumys isteıdi, patrıottyq baǵyttaǵy usynylatyn ádebıetter men fılmderdiń tizimi ázirlendi, psıhologııalyq demalys bólmeleri quryldy.
Sonymen qatar, ofıtserler men serjanttar úshin kóshbasshylyq quzyretterdi damytýǵa jáne tárbıelik jumysqa degen kózqarastardy jańartýǵa baǵyttalǵan kýrstar ótkizilýde. Barlyq deńgeıdegi komandırler jaýyngerlik daıyndyq pen tártipke ǵana emes, jeke quramnyń moraldyq-psıhologııalyq jaǵdaıyna da jeke jaýapkershilik alady.
«SARBAZ+» jobasy merzimdi áskerı qyzmettiń bir jylyn jeke tulǵalyq damý men praktıkalyq daǵdylardy ıgerý kezeńine aınaldyrýdy kózdeıdi. Bul óz kezeginde áskerı qyzmettiń bedelin arttyryp, qoǵamnyń armııaǵa degen senimin nyǵaıtýǵa yqpal etedi.
Aıta ketelik Qazaqstanda rezervtegi áskerı qyzmetke arnalǵan kelisimshart bekitildi.