Ásker qataryna jaramdylyq endi kompıýterlik test arqyly anyqtalmaq

ALMATY. QazAqparat - Bıyl ásker qataryna shaqyrylǵandardyń júıke-psıhıkalyq turǵydan áskerge jaramdy-jaramsyzdyǵy tuńǵysh ret kompıýterlik test arqyly anyqtalady. Bul týraly búgin Almaty qalalyq áskerge shaqyrylǵandar jınalatyn pýnktte ótken baspasóz máslıhatynda Almaty qalalyq qorǵanys isteri jónindegi departament bastyǵynyń orynbasary, podpolkovnık Omar Aıtqazın málim etti.

Onyń aıtýynsha, endi jastardy ásker qataryna qabyldaý kezinde olardyń jaramdy-jaramsyzdyǵyna adamı faktor áser ete almaıdy.

«Tuńǵysh ret «Aqsuńqar» dep atalatyn psıhodıagnostıkalyq keshen satyp alyndy. Eń bastysy, áskerge shaqyrylǵadardy tekserýde adamı faktor alynyp tastalyndy. Óıtkeni, psıhologtar áskerge shaqyrylǵandarmen áńgime júrgizý barysynda ár túrli kedergilerge ushyraýy múmkin, tipti qorqyp qalýlary da ǵajap emes.Sondyqtan, bıyl kúzgi shaqyrylym naýqanynda osyndaı kompıýterlik testilerdi qoldanyp jatyrmyz. Jastardyń psıhologııalyq ahýalyn tolyǵymen kompıýter anyqtaıtyn bolady», - dedi O. Aıtqazın.

«Aqsuńqar» dep atalatyn psıhodıagnostıkalyq keshendi qazaqstandyq mamandar reseılik mamandarmen birlese jasaǵan.

«Jańa test bıyl kúzgi shaqyrylym barysynda tuńǵysh ret qolǵa alyndy. Ol 44 ádistemeden turady. Biz naqty eki ádisteme boıynsha jumys isteımiz. Olar «Boljam 2» jáne «Beıimdilik» dep atalady. Olar ásker qataryna shaqyrylǵandardyń júıke-psıhologııalyq ustamdylyǵyn, áskerge daıyndyǵyn anyqtaýǵa baǵyttalǵan. Mysaly, «Boljam 2» ádistemesi 86 suraqtan, al «Beıimdilik» saýalnamasy 165 suraqtan turady. Onda áskerge shaqyrylǵan azamattyń júıke júıesi, psıhıkalyq ahýaly men moraldyq kúıi, kommýnıkatıvtik qabileti men tulǵalyq beıimdelý áleýeti anyqtalady.

Birinshi testi toltyrýǵa 20 mınýt, al ekinshi testiń suraqtaryna jaýap berýge 40 mınýt ýaqyt beriledi. Testerdiń qorytyndysyn tolyǵymen kompıýter óńdep, qaǵaz betine shyǵarady. Ol tek qolbasshylyq quramǵa ǵana arnalǵan. Jáne qupııa qujat bolyp esepteledi. Áskerge shaqyrylǵandardyń qolyna berilmeıdi», - dedi óz sózinde Almaty qalasy Qorǵanys isteri jónindegi departamenttiń psıhology, kapıtan Zýhra Kóbekova.

Aıta ketelik, bul qujat komandırler úshin tek usynys retinde. Sońǵy sheshimdi qolbasshylyq shyǵarady.

«Biz test nátıjesi qolymyzǵa tıgen soń, ony zertteımiz. Áskerge shaqyrylǵan árbir azamatpen jeke-jeke áńgime ótkizemiz. Máseleniń anyq-qanyǵyna kóz jetkizýge tyrysamyz. Bul jerde kompıýterlik test tek usynystyq sıpatqa ıe. Óıtkeni, qansha jerden myqty bolǵanymen kompıýter adamnyń ishki-dúnıesine, tabıǵatyn tolyq minezdeme bere almaıdy. Sondyqtan, psıhologııalyq jaǵynan jaramsyz dep tabylǵan azamatty áskerge alý-almaý komandırlerdiń jaýapkershiliginde. Degenmen, test nátıjesi - biz úshin bazalyq sheshim. Sondyqtan, áskerge shaqyrylǵan azamattyń ne úshin áskerge barýyna bomaıtyndyǵy oǵan baıyppen túsindiriledi. Bizde test arqyly ásker qatarynan qalyp qoıǵandar kóp emes. Mysaly, bıyl kóktemgi shaqyrylym kezinde 7 jigit júıke-psıhologııalyq ahýaly boıynsha áskerge jaramsyz bolyp shyqty», - dedi O. Aıtqazın.

Aıta ketelik, buǵan deıin psıholgııalyq test tek qaǵaz júzinde júrgizilip kelgen.