Ásker qataryna shaqyrylǵan jastarǵa qandaı jeńildikter bar

ALMATY. QazAqparat- Nesıesi bar sarbaz «nesıelik demalys» ala alady. Bul týraly óńirlik kommýnıkatsııalar qyzmeti brıfıngisinde Almaty qalasy Almaly aýdanynyń qorǵanys isteri basqarmasynyń bastyǵy polkovnık Aıdar Músirepov málim etti, dep habarlaıdy QazAqparat tilshisi.

Aıdar Músirepovtyń aıtýynsha, jastardyń áskerge degen qyzyǵýshylyǵyn arttyrý úshin Qorǵanys mınıstrliginde jańa joba qolǵa alyndy.

«Jastardyń áskerge degen qyzyǵýshylyǵyn arttyrý maqsatynda aýqymdy sharalar qolǵa alyndy. Mysaly, nesıesi bar merzimdi qyzmet sarbazdary «nesıelik demalys» dep atalatyn úzilis alady, qyzmet etý merzimi barysynda tóleý keıinge qaldyrylady. Jańa joba Qorǵanys mınıstrliginde bastaý aldy. Bul merzimdi áskerı qyzmetiniń bedelin arttyrady»,- dedi ol.

Sonymen qatar, spıker mınıstrlik joǵary oqý oryndaryna túsý boıynsha jeńildikterge bastama jasaǵanyn eske saldy.

Qyzmetin aıaqtaǵan sarbazdar aqyly negizde UBT-ny eseptemegende joǵary jáne joǵary oqý ornynan keıingi bilim berý mekemesine túsý quqyǵyna ıe bolady.

Merzimdi áskerı qyzmet kezeńinde jaýyngerlik daıarlyqta joǵary nátıjelerge qol jetkizgen qosalqy (zapasqa shyǵarylǵan) úlgili jaýyngerlerge UBT-syz, sonymen qatar JOO esebinen de oqý quqyǵy beriledi.

«Oqýǵa túsý kezinde áskerı kafedra emtıhansyz tegin bilim ala alady. Іrikteý merzimdi áskerı qyzmet atqarǵan jáne qyzmet barysynda jaqsy nátıje kórsetken áskerı qyzmetshiler qatarynan ótkiziledi», - dep atap ótti spıker.

Aıtýynsha, jastarǵa jeńildikter alý úshin HQKO-larda beriletin merzimdi áskerı qyzmetti ótkerý týraly anyqtamany jáne áskerı bılettiń kóshirmesin qosa otyryp, JOO-ǵa qujattardyń tizimin usyný jetkilikti. Búginde elimiz boıynsha 3 myńǵa jýyq grant bólindi. Bul bastamany 70-ke jýyq joǵary oqý oryndary quptady.

Buǵan deıin bıyl merzimdi áskerı boryshyn óteýge Almatydan 3 myń shaqyrylýshy jiberiletinin jazǵan bolatynbyz.