Ásker qatarynan ketip jatqandar sany azaımaı tur - QR Qorǵanys mınıstriniń orynbasary

ASTANA. KAZINFORM — QR Qorǵanys mınıstriniń birinshi orynbasary – Qarýly Kúshteri Bas shtabynyń basshysy Sultan Qamaletdınov qyzmetinen ketip jatqan áskerıler nelikten azaımaı jatqanyn aıtty.

«Salada problema barshylyq. Olar shuǵyl ári naqty kelisilgen sharalardy talap etedi. Bul rette, depýtattardyń qoldaýyna úmit artamyz. Áskerı qyzmetkerlerdiń áskerden ketýi úrdisi baıqalyp otyr. Jyl saıyn ásker qatarynan ketip jatqandar sany azaımaı jatyr. Tek 2020-2023 jyldar aralyǵynda Qarýly Kúshter qatarynan 17 065 áskerı qyzmetshi bosatyldy (onyń 4 301-i ofıtser, 12 764-i kelisimshartpen júrgen áskerıler). Bul shamamen 15 mehanıkalandyrylǵan brıgadanyń sanyna teń», - dedi Sultan Qamaletdınov Parlamenti Májilisiniń Halyqaralyq ister, qorǵanys jáne qaýipsizdik komıtetiniń otyrysynda.

Onyń aıtýynsha, qazirgi kezde armııany áskerı qyzmetkerlermen jasaqtaý sharasy qyzmetten ketken kásibı daıarlanǵan kadrlardyń ornyn tıisti deńgeıde toltyra almaı jatyr.

«Atalǵan kezeńde Qarýly Kúshter qataryna 14 311 áskerı qyzmetshi qosyldy. Munyń bir sebebi - salystyrmaly túrde alǵanda jalaqy deńgeıi tómen», - dedi Qorǵanys mınıstriniń birinshi orynbasary.