«Ásker barysy-2021» jeńimpazy anyqtaldy
Qazaqstannyń barlyq kúshtik qurylymdarynan qyryqtan asa myqty palýan «Ásker barysy» tıtýly úshin kúreske jáne qazaq kúresinen «Qazaqstan barysy» respýblıkalyq týrnırine joldama aldy.
«Barlyq qatysýshylar saıysqa barynsha jaqsy daıyndalǵan. Búgin ár jekpe-jek qyzyqty, ári tartysty ótti. Jyl saıyn Qarýly Kúshter sheńberinde chempıonattar qarqyndy ótkizilýde. Qatysýshylardyń sany ǵana emes, sondaı-aq áskerı qyzmetshi sportshylardyń sheberlik deńgeıi de artyp keledi», - dep týrnır jóninde «Qazaqstan Barysy» qazaq kúresin qoldaý jáne damytý qorynyń atqarýshy dırektory Janarbek Atyǵaev atap ótti.
Jarys qorytyndysy boıynsha birinshi jáne ekinshi oryndardy Armııa ortalyq sport klýbynyń sportshylary efreıtor Ádil Orazbaev pen Erasyl Qajybaev qanjyǵalady. Júldeli úshinshi oryn «Ońtústik» óńirlik qolbasshylyǵynyń áskerı qyzmetshisi efreıtor Ertýǵan Tórenovke buıyrdy.
«Jeńis ońaı bolǵan joq, óıtkeni barlyq qarsylastar jaqsy shynyqqan, joǵary kásibı sheberlik dárejesin kórsetti. Bul jeńispen toqtap qalmaımyn, keleshekte alar talaı asý bar, alda «Qazaqstan barysy» respýblıkalyq týrnırine úlken daıyndyq kútip tur. Sol kezde Qarýly Kúshterdiń ar-namysyn qorǵaıtyn bolamyn», – dedi jarys jeńimpazy efreıtor Ádil Orazbaev.
2018 ben 2019 jyldar aralyǵynda áskerı sportshy efreıtor Erasyl Qajybaev «Ásker barysy» týrnıriniń jeńimpazy atanǵan bolatyn. Sondaı-aq eki márte «Qazaqstan barysy» kúmis belbeýin jeńip aldy.
