Asqazan aýrýlary tuqym qýalaıdy – gastroenterolog
ASTANA. KAZINFORM – Asqazan-ishek joly aýrýlarynyń alǵashqy belgilerin der kezinde anyqtap, mamanǵa qaralý asa mańyzdy. Bul týraly gastroenterolog Indıra Erjanova Jibek Joly telearnasynyń Búgin LIVE baǵdarlamasynda aıtty.
Indıra Erjanovanyń sózinshe, qazirgi kezde asqazan-ishek jolynyń qabyný aýrýlary jıilegen. Ásirese kúz mezgilinde qabyný protsesi kúsheıe túsedi. Onyń negizgi sebebi – durys tamaqtanbaý, zııandy ádetter alkogol ishý, temeki shegý oǵan qosa sozylmaly kúızeliste áser etedi. Sondaı-aq qabynýdy ınfektsııalar, bakterııalar, vırýstar, aýtoımmýndyq jáne tuqym qýalaıtyn faktorlar qozdyrýy múmkin.
– Asqazan aýrýlary tuqym qýalaýy múmkin. Eger belgili bir genetıkalyq beıimdilik bolsa, bul dert qaıtalanýy yqtımal. Sondyqtan biz naýqastan mindetti túrde ata-anasynda asqazanǵa qatysty, ásirese isik aýrýlarynyń bolǵan-bolmaǵanyn suraımyz. Kóp jaǵdaıda pankreatıt, ót-tas aýrýlary genetıkalyq turǵyda beriledi. Sonymen qatar ishekke qatysty qabyný aýrýlary – mysaly, kron aýrýy men ishektiń jaraly aýrýlary kóbine aýtoımmýndyq, tuqym qýalaıtyn syrqattar qataryna jatady, – dep túsindirdi gastroenterolog.
Sonymen qatar dáriger mundaı jaǵdaıda durys jáne tártipti tamaqtanýdyń mańyzyn atap ótti. ıAǵnı, tamaqtaný belgili bir ıntervalmen, birdeı ýaqyt aralyǵynda bolýy tıis. Oǵan qosa taǵam ratsıonynda kókónister men jemisterge baı talshyqtar, aqýyz jáne paıdaly maılar jetkilikti bolýy qajet. As qorytý júıesi durys jumys isteýi úshin osyndaı teńgerimdi tamaqtaný mańyzdy. Bul óz kezeginde kóptegen aýrýlardyń aldyn alýǵa kómektesedi.
Mamannyń aıtýynsha, kofeniń quramyndaǵy kofeın asqazan qyshqyldyǵyn arttyryp, qyjyldaý, qaıta-qaıta kekirý, ishtiń qyzyp isiný sııaqty jaısyzdyqtarǵa ákelýi múmkin.
– Ár patsıenttiń aýrý sezimtaldyǵy ártúrli. Alǵashqy belgilerdiń biri – epıgastr aımaǵyndaǵy aýyrsyný. Aýrý sezimi oń nemese sol jaq qabyrǵaǵa berilýi, júrek aıný, qusý, qyjyldaý, tamaqty jutynýdyń qıyndaýy baıqalady. Sonymen qatar tábettiń tómendeýi, ish qatý nemese ótýi, salmaq joǵaltý, álsizdik sııaqty belgiler paıda bolsa, mindetti túrde gastroenterologqa júginý qajet, – dedi ol.
Buǵan deıin elimizde qazir túrli ashyǵý ádisin usynatyn mamandar kóp. Kazinform tilshisi gastroenterolog Saǵyndyq Rysmaǵanbetovpen kezdesip, durys jolyn suraǵan edi.