Asqar Jumaǵalıev sońǵy kezdegi eGov portalyndaǵy rekordtyq kórsetkishter týraly aıtty
«Ózderińiz bilesizder, elimizde tótenshe jaǵdaı jarıalandy. Bul kúnderi meniń áriptesterim barlyq resýrstardy iske qosyp, múmkindiginshe jumys isteýde. Osy múmkindikti paıdalana otyryp, olarǵa zor alǵys bildiremin. Elektrondy úkimettiń jumys isteý múmkinshiligine toqtalsaq, halyqqa qyzmet kórsetý ortalyqtary jabylǵannan keıin, portal shtattyq rejımde jumys istedi. Tótenshe jaǵdaıǵa baılanysty portaldy paıdalanýshylar sany birden kóbeıdi. Osyǵan qaramastan portal shtattyq rejımde jumysyn jalǵastyrdy», - dedi mınıstr «Habar 24» telearnasynyń tikeleı efırinen.
Onyń sózine qaraǵanda, TJ kezeńinde mıllıonnan astam elektrondy qyzmet kórsetildi.
«Kúndelikti rejımde portalda saǵatyna 600 myń ótinim túsetin. Qazir eń joǵary shektegi júkteme kezinde saǵatyna 15 mıllıonǵa deıin jetip otyr. Bul óz kezeginde eleýli júkteme», - dedi A. Jumaǵalıev.
Budan bólek mınıstr tótenshe jaǵdaı kezinde áleýmettik tólemge ótinim berýde keıbir qıyndyqtarǵa baılanysty bolǵan eskertýlerge pikir bildirdi.
A. Jumaǵalıevtiń aıtýynsha, 42 500 teńgeniń tólemi boıynsha qyzmetti engizýge qatysty reglament 28 naýryzda bekitildi. Osy oraıda ІT-mamandarǵa bul reglament jetkizildi.
«Biz túni boıy jumys istep, atalǵan qyzmetti iske qostyq. Osydan keıin áleýmettik tólemdi usynýǵa qatysty tıisti qyzmetti iske asyrýdy bastadyq. Portalda bir mezgilde 15 mıllıonǵa deıingi sessııa tirkeldi. Bul kórsetkish barlyq shtattyq rejımderden asyp tústi. Árıne, bul turǵyda belgili bir máseleler týyndap, biz problemalardy sheshý maqsatynda syrtqy kanaldardy ajyrattyq», - dedi vedomstvo basshysy.
Budan buryn habarlanǵandaı, 42 500 teńgelik áleýmettik tólem 3 mıllıonǵa jýyq adamǵa beriledi.
Sonymen qatar, Eńbek jáne halyqty áleýmettik qorǵaý mınıstri Birjan Nurymbetov sáýirde elimizde 42 500 teńgelik tólemdi alýǵa bolatyn arnaıy saıttyń ashylatynyn málimdedi.