Asqar Jumaǵalıev «Roskosmos» basshysymen kezdesti

ASTANA. QazAqparat - Baıqońyr ǵarysh aılaǵynda «Soıýz MS-12» TBK iske qosý naýqany barysynda Qazaqstan Respýblıkasynyń Tsıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev «Roskosmos» korporatsııasynyń Bas dırektory Dmıtrıı Rogozınmen kezdesti. Bul týraly atalmysh mınıstrlikke silteme jasap QazAqparat habarlaıdy.

Kelissózge sondaı-aq Baıqońyr qalasy ákimshiliginiń basshysy Konstantın Býsygın jáne Qyzylorda oblysynyń ákimi Qyrymbek Kósherbaev qatysty.

Kezdesýde «Baıqońyr» keshenindegi jáne jalpy ǵarysh salasyndaǵy yntymaqtastyqqa arnalǵan keń aýqymdy máseleler qaraldy. Atap aıtqanda, taraptar «Báıterek» ǵarysh zymyran keshenin qurý jónindegi jobany iske asyrý boıynsha jumystardyń barysyn talqylady jáne 2022 jyly onyń ushý synaqtaryna shyǵatyn odan ári birlesken is-qımyl tártibin kelisti. Taraptardyń nazary jobanyń kommertsııalyq tartymdylyǵyn qamtamasyz etýdiń mańyzdylyǵyna da aýdaryldy.

Kezdesýde sondaı-aq taraptar múddesinde odan ári paıdalaný maqsatynda Gagarın startyn jańǵyrtý jobasyn BAÁ-men birlesip úsh jaqty iske asyrý, One Web baǵdarlamasy boıynsha iske qosý qyzmetterin iske asyrýda Reseı men Qazaqstannyń múddeli memlekettik organdary men uıymdarynyń ózara is-qımyly máseleleri qaraldy.

Kezdesý barysynda delegatsııalar Baıqońyr qalasynyń damý perspektıvasy men problemalyq máselelerin sheshýge, onyń turǵyndarynyń laıyqty turǵyn úı-kommýnaldyq jáne áleýmettik-saıası jaǵdaılaryn qamtamasyz etýge baǵyttalǵan birlesken sharalardy talqylady. Atap aıtqanda, bıznesti damytý, halyqtyń jumyspen qamtylýy úshin qolaıly jaǵdaı jasaýǵa múmkindik beretin "Baıqońyr" erkin ekonomıkalyq aımaǵyn (EEA) qurý jónindegi jumys tobyn qurý týraly sheshim qabyldandy.

Delegatsııa basshylary «Baıqońyr» kesheni jónindegi Reseı-Qazaqstan úkimetaralyq komıssııasy qyzmetiniń tıimdiligin joǵary baǵalady jáne aǵymdaǵy jyldyń sáýir aıynda Máskeýde onyń altynshy otyrysyn ótkizý týraly aldyn ala kelisim jasaldy.