Asqar Jumaǵalıev Pavlodardaǵy HQO jumysymen tanysty
PAVLODAR. QazAqparat - Pavlodar qalasynda saparmen bolǵan QR Tsıfrlyq damý, ınnovatsııalar jáne aeroǵarysh óndirisi mınıstri Asqar Jumaǵalıev halyqqa qyzmet kórsetý ortalyqtarynyń jumysymen tanysty, dep habarlaıdy QazAqparat Úkimettiń baspasóz qyzmetine silteme jasap.
Investorlar úıindegi «Zamanaýı aqparattyq tehnologııalar men bıznes» atty IT-forýmǵa
qatysqan mınıstr qaladaǵy №3 HQO bóliminde de boldy. Halyqqa qyzmet kórsetý ortalyǵynyń
jumysymen «Azamattarǵa arnalǵan úkimet» memlekettik korporatsııasynyń basqarma
tóraıymy Ásemgúl Baltasheva tanystyrdy. Front-ofıs kúnine pavlodarlyqtarǵa
1200-ge jýyq qyzmet kórsetedi, onyń jartysynan kóbin turǵyndar elektrondyq
formatta alady.
Mınıstr budan bólek, jańadan ashylǵan kóshi-qon qyzmeti ortalyǵynda da boldy.
Sheteldik eńbek mıgranttaryna «bir tereze» qaǵıdaty boıynsha qyzmet kórsetetin
ortalyq 1 shildeden bastap jumys istep keledi.
Aıta keteıik, Pavlodarlyq fılıalda memlekettik qyzmetter boıynsha 723 myńnan
astam qyzmet kórsetilgen, onyń 500 myńyn Ertis óńiriniń turǵyndary óz betinshe
«Connection point» sektory arqyly alǵan. Sondaı-aq pavlodarlyqtar 150
myńnan astam ETsQ rásimdegen, al mobıldi azamattar bazasynda tirkelgender sany
350 myńnan asty.
