Asqar Jumaǵalıev mamandandyrylǵan HQO jumysyn retke keltirýdi tapsyrdy

NUR-SULTAN. QazAqparat - QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev jáne QR Іshki ister mınıstriniń birinshi orynbasary Marat Qojaev Nur-Sultan qalasyndaǵy mamandandyrylǵan HQO-nyń jumysyn tekserdi. Bul jóninde vedomstvonyń baspasóz qyzmetine silteme jasap QazAqparat habarlaıdy.

Esterińizge sala keteıik, sońǵy kúnderi birqatar mamandandyrylǵan HQO-da ІІM aqparattyq júıelerindegi tehnıkalyq jańartýlarǵa baılanysty avtokólikti tirkeýge qoıý jáne kólik júrgizýshi kýáligin rásimdeý qyzmetterin kórsetýde kidirister baıqaldy.

«Azamattarǵa arnalǵan úkimet» memkorporatsııasynyń basqarma tóraǵasy Ásemgúl Baltasheva mamandandyrylǵan HQO-da úzdiksiz qyzmet kórsetý protsesin qamtamasyz etý úshin ІІM-men birlese júrgizilip jatqan jumystardyń nátıjesi týraly habardar etti.

«Sońǵy táýlikterde ІІM qyzmetkerleri suranystardy óńdeý jyldamdyǵyn arttyrý úshin óz júıelerine birqatar tehnıkalyq ózgerister engizdi. Azamattarǵa arnalǵan úkimet qyzmetkerleri de barlyq qajetti kómekti kórsetýde. Qazirgi ýaqytta qyzmet kórsetý jyldamdyǵy artty», - dedi Ásemgúl Baltasheva.

QR ІІM birinshi orynbasary Marat Qojaev ótken túnde júıede 6 jańartý jumysy júrgizilgenin jetkizdi. Sondaı-aq, óz bólimshesine búgin keshke deıin barlyq aqaýdy joıýdy tapsyrdy.

Sonymen birge, Asqar Jumaǵalıev bul máseleni áli de baqylaýda ustaıtynyn jetkizdi. Memlekettik korporatsııaǵa jáne «Ulttyq aqparattyq tehnologııalar» kompanııasyna jaǵdaıdy tolyq retteý úshin kómek kórsetýdi jalǵastyrý qajettigin aıtty. Mınıstr sondaı-aq, búgin mamandandyrylǵan HQO-na sońǵy klıentke qyzmet kórsetilgenshe jumys isteýdi tapsyrdy.