Asqar Jumaǵalıev QR Baılanys jáne aqparat agenttiginiń tóraǵasy bolyp taǵaıyndaldy
ASTANA. QazAqparat - Úkimet qaýlysymen QR Baılanys jáne aqparat agenttiginiń tóraǵasy bolyp Asqar Jumaǵalıev taǵaıyndaldy, dep habarlaıdy primeminister.kz.
Búgin QR Premer-Mınıstri Serik Ahmetov Kólik jáne kommýnıkatsııa mınıstrligi men Baılanys jáne aqparat agenttiginiń ujymyna jańa basshylardy tanystyrdy.
S. Ahmetov A. Jumaǵalıevke KKM basshysy laýazymynda atqarǵan jemisti eńbegi úshin alǵys aıta otyryp, «jańa memorgannyń jumysyn uıymdastyrýda, el Prezıdenti alǵa qoıǵan mindetterdi sheshýde onyń kásibı sheberligi jetetinine» senim bildirdi. Premer-mınıstr alǵa qoıǵan mindetterdi oryndaýda J. Qasymbek pen A. Jumaǵalıevke tabystar tiledi. QR Baılanys jáne aqparat agenttigi Elbasynyń «Qazaqstan Respýblıkasynyń memlekettik basqarý júıesin odan ári jetildirý týraly» Jarlyǵymen Úkimet quramyna kirmeıtin ortalyq atqarýshy organ retinde quryldy. Asqar Jumaǵalıev «Jaryq» JShS Bas dırektory; Qazaqstan Respýblıkasynyń Kólik jáne kommýnıkatsııa mınıstrliginde Baılanys salasyndaǵy memlekettik qadaǵalaý basqarmasynyń bastyǵy, Baılanys jáne aqparattandyrý komıtetiniń tóraǵasy bolyp qyzmet atqardy. Qazaqstan Respýblıkasy Aqparattandyrý jáne baılanys agenttigi qurylǵan sátten bastap tóraǵa orynbasary, 2004 jyldyń qyrkúıegi men 2005 jyldyń qańtary aralyǵynda tóraǵa mindetin atqardy. 2005 jyldyń mamyrynan Qazaqstan Respýblıkasy Aqparattandyrý jáne baılanys agenttigi tóraǵasynyń birinshi orynbasary. 2006 jyldyń 27 qańtarynda Qazaqstan Respýblıkasy Aqparattandyrý jáne baılanys agenttiginiń tóraǵasy laýazymyna taǵaıyndaldy. 2006 jyldyń 11 qazannan 2010 jyldyń naýryzyna deıin «Qazaqtelekom» AQ Basqarmasynyń tóraǵasy. 2010 jylǵy 12 naýryzdan 2012 jylǵy 20 qańtarǵa deıin QR Baılanys jáne aqparat mınıstri qyzmetin atqardy. 2012 jylǵy 20 qańtardardan búgingi kúnge deıin QR Kólik jáne kommýnıkatsııa mınıstri boldy. Atalǵan vedomstvony búginnen bastap QR Prezıdentiniń Jarlyǵymen Jeńis Mahmuduly Qasymbek basqaratyn boldy.
