Asqar Jumaǵalıev Qazaqstandaǵy Qazposhtanyń tuńǵysh tsıfrlyq keńsesin ashty
Aıta ketsek, Qazposhtanyń tuńǵysh Tsıfrlyq keńsesi Astana qalasynda ashylyp otyr. Munda buryn operatorlar kórsetetin qyzmetterdiń kóbin zamanaýı tehnologııalar men robottar kórsetedi. Qazposhta basshysy Sáken Sársenov Premer-Mınıstrdiń orynbasary Asqar Jumaǵalıevke keńseniń jumysyn tanystyrdy.
Sáken Sársenovtyń aıtýyna qaraǵanda, tsıfrlyq keńsede gıbrıdti bankomattar, elektrondyq kassır, poshtamat jáne VR-agent qyzmet kórsetedi. Qazposhtanyń bolashaq keńselerinde klıentter poshtalyq jáne qarjylyq qyzmetterdi ózderi atqara alady. Sondaı-aq, post.kz saıty qyzmetteriniń munda barlyq túrin paıdalanýǵa bolady. Atap aıtqanda, aqsha aýdarýǵa, kommýnaldyq tólemderdi, jol erejesin buzǵany úshin aıyppuldardy tóleýge, avıa jáne temirjol bıletterin satyp alýǵa jáne t.b. qyzmetterdi paıdalanýǵa bolady.
«Qazposhta klıentterdi jedel ári sapaly qyzmet kórsetýge múmkindik beretin eń sońǵy zamanaýı tehnologııalyq sheshimderdi taratýshy retinde ózin burynnan-aq tanytty. Qazir biz elektrondy kommertsııany qarqyndy damytýdamyz. Bólimshelerdi jańartyp, kóptegen servısterimizdi onlaın-formatqa kóshirýdemiz. Búginniń ózinde biz adamdarǵa mashınalar qyzmet kórsetetin bólimsheni asha otyryp, elimizdiń tsıfrlyq saladaǵy bolashaǵyn qalyptastyrmaqpyz», - deıdi óz sózinde Qazposhta basshysy Sáken Sársenov.
Bólimsheniń jumysyn tolyqtaı almastyra alatyn taǵy bir biregeı qurylǵy - gıbrıdti bankomat. Ol tólem kartasyna tapsyrys berýge jáne alýǵa kómektesedi, al aldaǵy ýaqytta saýsaq pen bet-álpet boıynsha bıometrıkalyq verıfıkatsııalaý qosylǵannan keıin esepshottan kartanyń ózinsiz qolma-qol aqsha alýǵa múmkindik týady.
Sáken Sársenov sonymen qatar, Asqar Jumaǵalıevke «Qýanysh» pen «Sáýle» atty robottardy tanystyryp ótti. «Sáýle» klıentterdiń bilgisi kelgen suraǵyn tyńdap, qajetti baǵyt-baǵdar berse, «Qýanysh» kelgen adamdardyń kóńil-kúıin kóteredi.
Aldaǵy ýaqytta Qazposhta mundaı keńselerdi elimizdiń birneshe qalasynda iske qospaq.