Asqar Jumaǵalıev: Qazaqstanda tórtinshi GSM-operatordyń iske qosylýy - saladaǵy taǵy bir mańyzdy oqıǵa
ASTANA. QazAqparat - Qazaqstanda tórtinshi GSM-operatordyń iske qosylýy - saladaǵy taǵy bir mańyzdy oqıǵa. Búgin QR Baılanys jáne aqparat agenttiginiń tóraǵasy Asqar Jumaǵalıev «Altel» kompanııasy ıntonatsıondyq LTE/GSM/UMTS jelisin tanystyrǵannan keıin memlekettik organ basshylarynyń resmı blog-tuǵyrnamasynda osylaı málim etti.
«Búgin jańa GSM-operatorynyń iske qosylýyna arnalǵan sharaǵa bara jatyp, sońǵy jyldary uıaly baılanys salasynda oryn alǵan oń ózgeristerge oı júgirttim. Qyzmet baǵasy birneshe ese arzandady, lımıtsiz tarıfter usynyla bastady, ınterkonnekt mólsherlemesi 40-45 % tómendedi, sekýndtyq tarıfteýge tolyq kóshtik, 3G jáne 4G baılanys qyzmetteri engizildi. Naryqqa tórtinshi GSM-operatorynyń kelýi baılanys salasyndaǵy mańyzdy oqıǵalardyń biri. Jańa oıynshy atalǵan saladaǵy básekelestiktiń artýyna, qyzmet sapasynyń jaqsarýyna, tarıftiń tómendeýine yqpal etedi»,-dedi agenttik basshysy.
Onyń sózine qaraǵanda, kelesi jyly baılanys operatoryn aýystyrý kezinde telefon nómirin ózgertpeýge múmkindik beretin jańa qyzmet (MNP) synaqtan ótkizilmek. Jańa qyzmetti iske qosý "Aqparattyq Qazaqstan -2020» baǵdarlamasyna engizilgen. Bul qyzmet mobıldi baılanys naryǵyndaǵy básekelestikti damytýǵa kezekti ret yqpal etpek.
«Abonenttiń telefon nómirin aýystyrmaı kelesi bir operatorǵa aýysa alatynyn eskersek, kompanııalar arasynda klıent úshin talastyń kúsheıe túsetini belgili. Bul kezde tarıf mólsheri men qyzmet sapasyna basymdyq beriletin bolady»,-dep atap ótti A. Jumaǵalıev.
Atap aıtqanda, vedomstvo tarapynan 2014 jyly Astana men Almaty qalalarynda uıaly baılanys jelileriniń qoljetimdiligine, daýys dybystarynyń berilý sapasyna kezekti ret taldaý jumystary júrgizilýde. «Taldaý nátıjesine sáıkes, baılanys operatorlaryna bazalyq stantsııalardyń sanyn kóbeıtý, usynylyp otyrǵan qyzmet sapasyn jaqsartý, jelilerdi retke keltirý sekildi óz usynystarymyzdy beretin bolamyz. Buǵan qosa, "Ákimshilik quqyq buzýshylyq týraly Qazaqstan Respýblıkasy Kodeksiniń jańa redaktsııasy jobasyna paıdalanýshylarǵa baılanys qyzmetin usynyp otyrǵan baılanys operatorlaryn jaýapkershilikke tartatyn norma engizdik. Joǵaryda aıtyp ótken sharalardyń barlyǵy baılanys salasynyń damýyna oń áser etedi degen senimdemin»,-dep túıdi agenttik tóraǵasy.
