Asqar Jumaǵalıev elektrondyq densaýlyq pasporty halyqtyń 80% bolýyn tapsyrdy
ASTANA. QazAqparat - Elordadaǵy Respýblıkalyq elektrondyq densaýlyq saqtaý ortalyǵynda QR Premer-Mınıstriniń orynbasary Asqar Jumaǵalıev elektrondyq densaýlyq pasporty jobasymen tanysty, dep habarlaıdy QazAqparat tilshisi.
"Jobany belsendi jáne kásibı túrde iske qosyp jatqandaryńyz baıqalady. Bul jumysty jalǵastyrý kerek. Qazir negizgi jumystar júrgizilip jatyr. Jergilikti deńgeıde kompıýterler satyp alynyp, aqparattyq júıeler damýda. Sondyqtan atalǵan júıelerdiń durys jumys isteýin qamtamasyz etý mańyzdy. Muny jyl sońyna deıin aıaqtaý kerek", - dedi Asqar Jumaǵalıev tanystyrý rásiminde.
Vıtse-premerdiń aıtýynsha, júıeni iske qosqannan keıin dárigerler men patsıentterdi oqytý kerek. Sonymen qatar elektrondyq pasportty tolyqtyrý qajet.
"Qazir elimizdegi keı azamattarda elektrondyq pasport bar ekenin bilemin. Alaıda kórsetkishti 80% jetkizý kerek. Qazir zańǵa ózgerister engizý boıynsha jumys istep jatyrsyzdar. Atalǵan júıe 2019 jyldyń 1 qańtarynda jumys isteýi tıis", - dep tapsyrma berdi vıtse-mınıstr.
QR Densaýlyq saqtaý mınıstri Eljan Birtanov densaýlyq saqtaý salasynda aqparattyq tehnologııalar keńinen engizilip jatqanyn atap ótti.
"Qazir jańa segmentti - patsıentterge arnalǵan mobıldi qosymshalardy belsendi damytyp jatyrmyz. Bul qosymshalar emhanalar men medıtsınalyq aqparattyq júıelermen baılanystyrylǵan. ıAǵnı, qazirgi tańda júzmyńdaǵan adam mobıldik qosymshany qoldanady - júkti áıelder men qant dıabetine shaldyqqandar jekelegen qosymshalardy júktep alyp, baqylaýǵa tura alady. Biz úshin mańyzdy taǵy bir jaıt - aýrýlardy esepke alý. Máselen, ana ólimi boıynsha: áıel Astanada bosanyp, úıine qaıtady. Eki aptadan soń, qyzýy kóterilip, sepsıspen aýrýhanaǵa túsedi. Oǵan dıagnoz qoıǵanda, júktiligi esepke alynbaıdy. Mundaı jaǵdaı birneshe ret kezdesti, shyn máninde statıstıkanyń basqasha ekenin kórdik. Al qazir elektrondyq pasport arqyly barlyq aýrý tarıhyn kórýge bolady. Endi patsıenttiń dıagnozyn joǵaltyp alý, qandaı da bir jaıttardy jasyryp qalýdan arylamyz. Bul medıtsınalyq kómek sapasyna eleýli áser etedi", - dep atap ótti mınıstr.
