Asqar Jumaǵalıev: Big Data salasynda belsendi jumys isteýge nıettimiz
QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń málimetinshe, aýqymdy derekterdi óńdeý máselesinde ǵylymı-tehnıkalyq, saıası kózqarasty zertteýmen aınalysatyn álemdegi jetekshi uıymdardyń ókilderi bul saladaǵy barlyq problemalardy ashyq kórsetip, olardyń sheshý joldaryn usyndy.
Mysaly, Ulybrıtanııanyń jasandy ıntellekt boıynsha Parlamenttik tobynyń tóraǵasy Lord Tım Klement Djons málimetterdi saqtaýdyń mańyzdylyǵyn atap ótti.
«Derbes derekterdi qorǵaý – búgingi kúnniń ózekti máselesi. Azamattardyń Internettegi derbes derekteri rettelmeıdi. Sol sebepti, jeke derekterdiń saqtalýyna baqylaýdy kúsheıtý óte mańyzdy», - dedi sarapshy.
Dúnıejúzilik banktiń tsıfrlyq damý tájirıbesiniń jetekshisi Djeın Tredvel tabysty sheshimder qabyldaý úshin adamı kapıtaldy damytýdyń mańyzdylyǵyn aıtty.
«Derekterdi saqtaý máselelerin retteıtin zańnamalyq aktiler kúrdeli. Sondyqtan aýqymdy derektermen jumys isteý kezinde táýekelderdi naqty esepteý úshin eń aldymen tsıfrlyq tehnologııalar naryǵyn nátıjeli zerdeleıtin saýatty kadrlar qajet», - deıdi Djeın Tredvel.
BUU-nyń Tsıfrlyq úkimet jónindegi konsaltıngtik fırmanyń prezıdenti jáne elektrondy úkimet jáne aqparatty basqarý máseleleri jónindegi Bas keńesshisi Rıchard Kerbıdiń pikirinshe, «Derekterdi derbes sanatqa jatqyzý máselesinde naqty túsiniktiń bolmaýy da – talqylanatyn mańyzdy problemalardyń biri».
Sarapshylar «aýqymdy derekterdi» saqtaý men óńdeýdiń damý joldaryna qatysty usynystaryn bildirip, kúsh-jiger men múmkindikterdi biriktirý qajet degen ortaq pikirge kelgenin aıtyp ótken jón. Kollaboratsııa álemdik qaýymdastyq kózdegen nátıjege, atap aıtqanda – derbes derekterdi jan-jaqty qorǵaý men qaýipsizdikti qamtamasyz etýge qol jetkizýge múmkindik beredi.
Asqar Jumaǵalıev, óz kezeginde, keńes múshelerine olardyń usynǵan ıdeıalary men bastamalary úshin alǵys bildirip, sarapshylardyń usynystary Big Data-men odan ári jumys isteý kezinde eskeriletinine sendirdi.
«Qazaqstan aýqymdy málimetter salasynda belsendi jumys isteýge nıetti. Tıisti zańnamalyq bazany ázirlep, jasandy ıntellektpen jumys isteý boıynsha birqatar ınnovatsııalyq jobalardy engizetin bolamyz. Sondyqtan Sizdiń usynystaryńyz bizdiń jumysymyzdy ońtaılandyrýǵa septigin tıgizbek. Biz syndarly ıdeıalar men tájirıbe almasý úshin ashyqpyz», - dep túıindedi Asqar Jumaǵalıev.
Sonymen qatar, forým aıasynda Asqar Jumaǵalıev BUU-nyń elektrondyq úkimet jáne aqparatty basqarý máseleleri jónindegi burynǵy bas keńesshisimen, sondaı-aq AngelsLabs, ACME jáne bValue Angels VC sheteldik venchýrlik kompanııalardyń basshylarymen kelissózder júrgizdi. Kezdesý barysynda Qazaqstan ekonomıkasynyń ınvestıtsııalyq tartymdylyǵy, yntymaqtastyqtyń ózara tıimdi joldary jáne Qazaqstandaǵy ınnovatsııalyq ekojúıeni odan ári damytý máseleleri talqylandy.