Asqar Jumaǵalıev «Batys Eýropa - Batys Qytaı» halyqaralyq dálizi qurylysy jaǵdaıymen tanysty
ASTANA. 22 qarasha. QazAqparat - QR Kólik jáne kommýnıkatsııa mınıstri Asqar Jumaǵalıev Ońtústik Qazaqstan jáne Jambyl oblysyndaǵy «Batys Eýropa - Batys Qytaı» halyqaralyq dálizi qurylysy jaǵdaıymen tanysty. Bul týraly atalǵan vedomstvonyń baspasóz qyzmetinen habarlandy.
Qazaqstannyń ońtústiginde qazirgi tańda 228 shaqyrym jolynda jumystar aıaqtaldy. Bıyl Shymkentten Jambyl oblysynyń shekarasyna deıin 80 shaqyrymǵa sozylǵan taǵy eki ýchaskede jumystar bastaldy. Kún raıynyń qatańdylyǵymen, ásirese tuman men boran saldarynan qatty jel jáne kórý múmkinshiliginiń tómen bolýymen belgili Shaqpaq-ata asýyna asa kóńil bólindi. Aımaqtyń osyndaı erekshelikterin eskere otyryp, osy ýchaskede qozǵalys qaýipsizdigin arttyrý úshin Avtomobıl joldary komıteti Qurylys jáne TKSh isteri komıtetiniń kelisýi jaǵdaıynda týnnel salýdy josparlap otyr. Jambyl oblysyn alsaq, qazirgi kezde Batys Eýropa-Batys Qytaı jobasy boıynsha 283 shaqyrym jolynda jumystar aıaqtalǵan. Mınıstr osy dáliz qurylysymen birge qanaǵatsyz jaǵdaıdaǵy basqa da respýblıkalyq joldardy qarap shyqty. Atap aıtqanda, 80-shi jyldary salynǵan Merke-Shý-Býrylbaıtal ýchaskesi kúni búginge deıin tolyq jóndeýden ótpegen. Mınıstrdiń aıtýynsha, osy jol baǵytynda kelesi jyly salqyn resaıkldeý tehnologııasyn qoldanýmen jóndeý jumystary ótkiziledi. Bul tehnologııa jol jabyndysyna jańa materıaldardy qosý arqyly ony qaıta qoldaný múmkindigin beretinin belgilegen jón. Mınıstr jol jóndeý jumystaryn bitirgennen keıin júk salmaǵy kóp kólikter qozǵalysyn shekteý maqsatynda elektrondyq tarazyny qurý jóninde tapsyrma berdi. 209 shaqyrym uzyndyqqa sozylǵan «RF shekarasy (Ekaterınbýrg qalasy) - Almaty» avtomobıl jolynyń Kúrty-Býrylbaıtal ýchaskesin jóndeý de josparlanǵan. «Osy ýchaskeni qurastyrý boıynsha joba-smeta qujattamasyn ázirleý jumystaryn biz kelesi jyly bastamaqpyz, sodan keıin birden qurylys jumystaryn júrgizemiz», - dedi mınıstr Asqar Jumaǵalıev. Ol asfaltti betondy jabyndysy men tosqaýyldy qorshaýy bar tórtjolaqty jol bolady. Kelesi jyly Qyzylorda-Jezqazǵan avtojolyn qaıta jańǵyrtý jumystary bastalatynyn atap ótken jón. Osylaısha jóndeý jumystary ońtústik jáne soltústik aımaqtardy qosatyn úsh jolda bastalady.
