Asqar Jumaǵalıev: Aýyl men qaladaǵy ınternet tarıfinde aıyrmashylyq bolmaıdy
Parlament Májilisindegi Úkimet saǵatynda tilshiler mınıstrden aýyldar men qalalalardaǵy ınternet tarıfinde aıyrmashylyqtyń bolýy múmkindigin surady.
Óz kezeginde Asqar Jumaǵalıev aýyldy jerlerge tartylǵan ınternettiń tarıfi qaladaǵymen birdeı bolatynyn jetkizdi.
«Dál osyndaı tarıf bolady, sebebi qyzmet tarıftik keste boıynsha usynylady. Búginde aýyl turǵyndaryna 5-6 ese qymbat ınternetti berý múmkin emes. Sondyqtan bul turǵyda salyqtyq jeńildik sharalary (kompanııalarǵa) eskeriledi», - dedi mınıstr.
Sonymen qatar, ol spýtnıktik baılanys jelisi qymbat tehnologııa sanatyna jatatynyn atap ótti.
«Ony paıdalanǵysy keletinderge biz tıisti múmkindikti beremiz. Bul qyzmet búginde aıtarlyqtaı qymbat. Osy oraıda keń jolaqty ınternetpen basqa tehnologııalar esebinen qamtýdy eskerip otyrmyz. Degenmen talshyqty jeli tartylýy qıyndaý eldi mekender bar, ıaǵnı bul aýyldardy tek spýtnıktik tehnologııamen qamtamasyz etý múmkindigi bolady», - dedi Asqar Jumaǵalıev.
Budan buryn habarlanǵandaı, Májiliste aýyldardy keń jolaqty ınternetke qosýdyń jospary baıandaldy.
Belgili bolǵandaı, joǵaryda atalǵan jobalardy oryndaý jumystarynyń nátıjesi boıynsha 2022 jyldyń sońyna deıin Qazaqstan Respýblıkasy halqynyń 97 paıyzy keń jolaqty ınternet jelisimen qamtylatyn bolady. Qalǵan 3 paıyzyna spýtnıktik tehnologııany qoldaný múmkindigi qamtamasyz etiledi.