Asqar Jumaǵalıev Astanada «bultty» beınebaqylaý júıesiniń jumysyn baǵalady
ASTANA. QazAqparat - QR Premer-Mınıstriniń orynbasary Asqar Jumaǵalıev pen Astana qalasynyń ákimi Áset Isekeshev Astanadaǵy «bultty» beınebaqylaý júıesi engizilgen turǵyn úı keshenin kórdi. Bul týraly búgin primeminister.kz habarlady.
Eske sala keteıik, «Qazaqtelekom» AQ usynatyn osy ınnovatsııalyq qyzmet 2017 jylǵy qyrkúıekten bastap barlyq óńirde qoljetimdi bolyp otyr. Servıs Qazaqstan qalalarynyń kóppáterli turǵyn úılerinde turatyn turǵyndardy qaýipsizdigin qamtamasyz etý jáne ómir súrý sapasyn arttyrýǵa baǵyttalǵan.
«Tsıfrlyq Qazaqstan» memlekettik baǵdarlamasynyń oń nátıjeleriniń biri tsıfrlyq transformatsııalaýǵa bıznes ınvestıtsııalaryn jumyldyrý maqsatynda memlekettik-jekeshelik áriptestik júıesin damytý bolyp otyr. Búgin biz kórgen joba - bıznes orta ókilderiniń jobalarǵa ınvestıtsııa quıyp, ony iske asyrýǵa úles qosyp jatqanynyń dáleli», - dedi QR Premer-Mınıstriniń orynbasary Asqar Jumaǵalıev.
Beınebaqylaý qyzmetin uıymdastyrý úshin derekterdi taratýdyń oqshaýlanǵan arnalaryn, tek sol kireberisten kiretin turǵyndarǵa ǵana qoljetimdi etip, kópdeńgeıli avtorızatsııa júıesin uıymdastyrý, paıdalanýshy ınterfeısteri men beınederekter qoımasy arasyndaǵy qoljetimdilikti shekteý arqyly beınederekter aǵynyn qorǵaý tetikteri jasaldy.
«Servıstiń turǵyndar jáne bıznes-klıentter arasyndaǵy tanymaldyǵy artyp keledi. Bul azamattar men bıznes múddelerin qorǵaıtyn senimdi tásil», - dedi «Qazaqtelekom» AQ basqarma tóraǵasy Qýanyshbek Esekeev.
Elordadaǵy turǵyn úı kesheninde júıe jumysyn tanystyrý barysynda ınnovatsııalyq servıstiń negizgi artyqshylyqtary kórsetildi: «bultty» baqylaý kóppáterli úılerdiń kireberisin únemi baqylap otyrý múmkindigin beredi. Paıdalanýshylar oǵan mobıldik qurylǵylar arqyly onlaın rejımde, servıstiń «jeke kabınetinde» qol jetkize alady, sońǵy jeti táýliktiń muraǵattyq beınejazbalary saqtalady.
Bıznes-klıentterge arnalǵan qyzmet 30 kúndik beınejazbany, klıentterdiń jeke beınekameralaryn ornatýdy qamtıdy. Aldaǵy ýaqytta kompanııa keler jyldyń sońyna deıin turǵyn úılerdiń kireberisterine 60 myń kamera ornatýdy josparlap otyr.
Osy oraıda aıta ketken jón, «Qazaqtelekom» aqparattyq-kommýnıkatsııalyq operatory ǵımarattardy, qalalardy basqarý boıynsha Smarthome, Smart city, Internet of Things zamanaýı júıelerin udaıy zerttep, damytyp keledi. Atalǵan júıeler qalalardaǵy nysandardy paıdalanýdyń tıimdiligi men qaýipsizdigin arttyrý, protsesterdi basqarý jáne ońtaılandyrý múmkindikterin beredi.
