Asqar Jumaǵalıev: Astana Hub-qa ózimiz kúsh salmasaq, syrttan eshkim kómektespeıdi
«Bárimiz jaqsy bilemiz, Astana Hub iske qosyldy. Іshinde qyzý jumys júrip jatyr. Jas jigitter kún-tún demeı, qyzyqty ıdeıalardy iske asyryp jatady. Astana Hub korporatıvti ınnovatsııalardyń ortalyǵyna aınalýy qajet. Bul degenimiz, memlekettik organdar men jeke kompanııalar IT tapsyrystaryn shetelge emes, ózimizdiń ınnovatorlarymyzǵa berýi kerek. Startaptar úshin barlyq jaǵdaı jasalǵan. Salyqtyq jeńildikter de berilip otyr. Venchýrlyq qarjylandyrý týraly zań qabyldandy», - dedi A.Jumaǵalıev QR Aqparat jáne kommýnıkatsııalar mınıstrliginiń alqa májilisinde.
Onyń aıtýynsha, aqparattyq texnologııalar salasyndaǵy otandyq ónimderdi kóbeıtý kerek. Al oǵan ózimiz kúsh salmasaq, syrttan eshkim kómektespeıdi.
Osy oraıda A.Jumaǵalıev jas ınnovatorlarǵa qoldaý kórsetýge úndedi.
«Árıne, keı kezde sátsizdikter bolyp jatady. Bireýler bankrotqa ushyraıdy. Degenmen, aıaqqa turyp, alǵa qaraı jyljý qajet. Onyń bári venchýrlyq qarjylandyrýda eskerilgen. Búgin sátsizdik bolsa, erteń tabysqa jetýimiz ábden múmkin. Jas ınnovatorlarymyzǵa senýimiz kerek», - dep atap kórsetti A.Jumaǵalıev.
Alqa májilisi kezinde QR Aqparat jáne kommýnıkatsııalar mınıstri Dáýren Abaev «Astana Hub»-ty damytý týraly aıtyp berdi.
Mınıstrdiń aıtýynsha, «Astana Hub»-ta sheteldik kompanııalar úshin vızalyq jáne eńbek rejımderi jeńildetildi. Salyqtyq jeńildikter de berildi. Tehnoparktiń aıasynda 3 akseleratorlyq baǵdarlama ótkizildi. Osylaısha,180 mıllıon teńge ınvestıtsııany quraıtyn 47 startap irikteldi. Búginde tehnopark bazasynda otandyq jáne sheteldik ІT-kompanııalardyń zerthanalary ornalastyryldy.
