Asqar Jumaǵalıev «Amazon Web Services» ókilderimen qazaqstandyq IT-mamandardy oqytý jaıyn talqylady
Baspasóz qyzmetiniń málimetinshe, bul kezdesýler Qazaqstan Prezıdenti Qasym-Jomart Toqaevtyń AQSh bıznes kapıtandarymen jýyrdaǵy kelissózderiniń jalǵasy bolǵan.
Asqar Jumaǵalıev «Amazon Web Services» ókilderimen bultty tehnologııalardy odan ári paıdalaný, qazaqstandyq IT-mamandardy oqytý jáne elektrondyq saýda salasyndaǵy ózara is-qımyl perspektıvalaryn talqylady.
Amazon Web Services – keńinen taraǵan bulttyq platforma, onyń álemdegi derekterdi óńdeý ortalyqtaryna 165 tolyq fýnktsıonaldy servısti usynýǵa múmkindigi bar ekenin aıtyp ótý kerek.
«Biz bultty tehnologııalar jáne qazaqstandyq ІT mamandaryn oqytý salasyndaǵy yntymaqtastyǵymyzdy keńeıtýge múddelimiz. Osy baǵyttaǵy jumystardyń sizdiń elińiz úshin ózekti jáne Qazaqstanda tsıfrlandyrýdy ilgeriletý protsesinde úlken mańyzǵa ıe ekenin bilemiz, sondyqtan bizdiń birlesken jumysymyz ózara tıimdi bolady dep úmittenemiz», - dep atap ótti Amazon Web Services-tiń Eýropa, Taıaý Shyǵys jáne Afrıka aımaǵy boıynsha memlekettik sektor dırektory Kemeron Brýks.
Startap-jobalar salasyndaǵy halyqaralyq yntymaqtastyqtyń ózekti máseleleri mınıstr Jumaǵalıevtiń «Plug and Play» ókilderimen kezdesýinde talqyladyndy.
2006 jyly qurylǵan Kompanııa salalyq akseleratsııa baǵdarlamalardyń kómegimen álemdegi eń úzdik startaptar men iri korporatsııalardy biriktiredi. Endi Astana Hub tehnoparkiniń qatysýshylary – qazaqstandyq startap-jobalary qatysýshylar qataryna qosyla alady. Tehnopark bazasynda kompanııa ókildigin ashý týraly kelisimge qol jetkizildi.
«Bizdiń kompanııanyń maqsaty – ınnovatsııany barlyǵy úshin jáne barlyq jerde qoljetimdi etý. Biz Qazaqstanmen yntymaqtastyqtyń zor áleýetin kórip otyrmyz jáne talantty adamdar da kóp eken. Biz osy startap-jobalardy ınvestıtsııalaýǵa jáne olardy jańa deńgeıge shyǵarýǵa daıynbyz», - dedi «Plug and Play» vıtse-prezıdenti Sobhan Hanı.
Asqar Jumaǵalıev óz kezeginde, kezdesýge qatysýshylarǵa jahandyq bastamalary úshin alǵys bildirip, nátıjeli dıalogqa ashyq ekendigin atap ótti.
«Qazaqstan Prezıdenti Qasym-Jomart Toqaev AQSh-qa sapary kezinde Amazon Web Services» jáne «Plug and Play» kompanııalarynyń basshylyǵymen Nıý-Iorkte jemisti kelissózder ótkizdi. Sol kezde Memleket basshysy bizdiń elimizdiń ekijaqty yntymaqtastyqty keńeıtýge múddeliligin atap ótti. Endigi bizdiń mindetimiz - ózara is-qımyl joldaryn egjeı-tegjeıli pysyqtaý jáne belgilengen josparlardy iske asyrýǵa kirisý. Biz sheteldik kompanııalarmen aýqymdy birlesken jobalardy júzege asyrýdy maqsat tutamyz», - dep túıindedi óz sózin Asqar Jumaǵalıev.
Kezdesýge qatysýshylar Qazaqstannyń ınnovatsııalyq salany damytýǵa áleýeti zor jáne ınvestıtsııalyq klımaty óte qolaıly ekenin atap ótti. Mınıstr óz kezeginde Qazaqstannyń tartymdy ınvestıtsııalyq klımatyn qoldaý jáne el ekonomıkasyndaǵy basym baǵyttarǵa ozyq tájirıbeni engizý jónindegi jumystar óz jalǵasyn tabatynyn aıtty.
