Asqar Jumadildaev basqaratyn «Ál-Jábrdiń atasy» jýrnaly ózbekshe jaryq kórdi
TAShKENT. KAZINFORM — Qazaqstanda shyǵatyn matematıka baǵytyndaǵy «Ál-Jábrdiń atasy» ǵylymı-tanymdyq jýrnaly ózbek tilinde jaryq kórdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
«Ál-Jábrdiń atasy» jýrnaly byltyr qarasha aıynda Qazaqstanda jaryqqa shyqty. Onyń bas redaktory — tanymal matematık, QR Ulttyq ǵylym akademııasynyń vıtse-prezıdenti Asqar Jumadildaev.
Basylym negizinen balalarǵa arnalǵan. Onyń qazaq tilindegi alǵashqy sany 2 myń danamen jarııalanǵan.
Keıin oǵan shet memleketterden qyzyǵýshylyq artyp, ony ózge tilderde basyp shyǵarý isi qolǵa alyndy. Atap aıtqanda, jýrnal alǵash ret ózbek tiline aýdarylyp, taıaýda Tashkent qalasynda oqyrman nazaryna tanystyryldy.
«Bul jýrnaldy shyǵarýǵa demeýshi bolǵan — meniń stýdentterim. Kezinde olar menen matematıka boıynsha birneshe keńes suraǵan edi. Sol kezde biler aqylymdy aıtqanmyn, sol nátıjeli bolsa kerek, qazir ol stýdentterim úlken jetisikke jetip jatyr. Meniń baıqaýymsha, qazaq jáne ózbek jastarynyń arasynda kóp uqsastyq bar. Atap aıtqanda, oqý, bilim, ǵylym júeısinde jáne minez-qulyqta aıyrmashylyq kóp emes. Sonyń nátıjesinde bolsa kerek, „Ál-Jábrdiń atasy“ jýrnalyna qyzyǵýshylyq óte joǵary», — dedi Asqar Jumadildaev.
Belgili matematık atalǵan jýrnaldyń ózbek tilindegi nusqasyn oqıtyn jastardyń qatary kóp bolaryna senimdi.
«Bizdiń maqsat — uly atalarymyzdyń jolyn jalǵastyrý. Kezinde búkil álemniń damýyna ǵalamat úles qosqan Ortalyq Azııadan shyqqan eki adam bolsa, sonyń biri — Ál-Horezmı. Ol ǵulamadan myna eki sózi qaldy: algebra jáne algorıtm. Qarapaıym telefon, teledıdar jáne tehnıkanyń ózge de túrleri áýeli algorıtmnen quralady», — dep toqtaldy Asqar Jumadildaev.
Ózbekstandyq ǵalymdar balalardyń matematıka ǵylymyn ıgerý jolynda bul jýrnaldyń aıtarlyqtaı paıdasy tıetinine senim bildirýde.
Bilimge qushtar búldirshinderdiń sanasyna serpilis jasaý maqsatynda basylymnyń mazmunyn tereńdete túsý usynystary da aıtyldy.
Onyń ishinde qıyn taqyryptardy erekshe ádistermen túsindirýge baǵyttalǵan oıyndardy qoldaný josparlanyp otyr.
«Bul jýrnaldyń ózbek tilinde jaryq kórýin qazaq-ózbek ǵalymdary arasyndaǵy ózara yntymaqtastyq pen dostyqtyń jarqyn kórinisi dep aıtýǵa bolady. „Ál-Jábrdiń atasy“ jýrnalynyń shyǵýyna eki eldiń ǵylym akademııalary, tıisti mınıstrlikteri men jas ǵalymdary qyzyǵýshylyq bildirdi, úles qosty. Aldaǵy ýaqytta onyń mazmuny tereńdep, oqyrmanyn jańa bilimmen sýsyndatady degen úmittemiz. Balalardyń matematıkaǵa degen qyzyǵýshylyǵyn arttyrý maqsatynda jýrnalǵa ózgeshe reńk berý týraly pikirler aıtyldy. Oǵan saı, búldirshinderge osy aýyr ǵylym salasyn túrli oıyndar arqyly jetkizý josparda bar», — dep pikir qosty ÓR Ǵylym akademııasy Jas ǵalymdar keńesi tóraǵasynyń orynbasary Gýlsanam Tıllaeva.
«Ál-Jábrdiń atasy» jýrnaly ózbek tilinde aıyna bir ret shyǵarylady. Ol bastapqyda qazaq tilinde jaryq kórgen nusqasynyń aýdarmasy retinde júredi.
