Asqar Jumadildaev, Aqylbek Kúrishbaev, Serik Aqsholaqov — UǴA quramyna jańadan 9 ǵalym endi
ALMATY. KAZINFORM – QR Prezıdenti janyndaǵy Ulttyq ǵylym akademııasynyń quramyna jańadan toǵyz ǵalym endi.
Akademııanyń jańa múshelerin saılaý QR Ǵylym jáne joǵary bilim mınıstrligi bekitken qaǵıdalarǵa sáıkes, eldiń ǵylymı uıymdary men joǵary oqý oryndary usynǵan úmitkerler arasynan saılandy.
Qazaqstan Respýblıkasy Prezıdentiniń janyndaǵy Ulttyq ǵylym akademııasynyń basshysy Aqylbek Kúrishbaevtyń sózinshe, eń aldymen, qoldanystaǵy zańnyń aıasynda QR Úkimetiniń sheshimine sáıkes qurylǵan ótpeli tóralqa úsh akademıkti saılady.
«Budan ári, Qazaqstan Respýblıkasy Ǵylym jáne joǵary bilim mınıstrligi bekitken akademıkterdi saılaý qaǵıdalaryna sáıkes, eldiń ǵylymı uıymdary men joǵary oqý oryndary usynǵan úmitkerler arasynan úsh kezeńdik saılaý ótkizildi. Aldymen usynylǵan qujattardyń tolyqtyǵy jáne úmitkerlerdiń belgilengen krıterııler men talaptarǵa sáıkestigi tekserildi. Keıin saraptama komıssııasy árbir úmitkerdiń sapalyq jáne sandyq kórsetkishteri boıynsha qorytyndy jasady. Úshinshi kezeńde Ǵylym akademııasynyń Tóralqasy árbir úmitkerdiń baǵdarlamasynyń ózektiligin, jańashyldyq deńgeıin, tıimdiligin, nysanaly kórsetkishterge qol jetkizýi men onyń resýrstyq qamtamasyz etilýin tyńdady», – dep túsindirdi Aqylbek Kúrishbaev.
Nátıjesinde UǴA quramyna ǵylymda erekshe jetistikteri bar toǵyz ǵalym endi.
Akademık atanǵan 9 adamnyń ishinde belgili matematık Asqar Jumadildaev, qazaq neırohırýrgtary assotsıatsııasynyń prezıdenti Serik Aqsholaqov, «PERSONA» halyqaralyq klınıkalyq reprodýktologııa ortalyǵynyń jetekshisi Vıacheslav Lokshın, «Nazarbaev Ýnıversıteti» DBBU qaýymdastyrylǵan professory Suraǵan Dórbethan, Energetıka mınıstrliginiń «ıAdrolyq fızıka ınstıtýty» Astana fılıalynyń dırektory Maksım Zdorovets, ál-Farabı atyndaǵy qazaq ulttyq ýnıversıtetiniń professory Tilekqabyl Ramazanov, «Ósimdikter bıologııasy jáne bıotehnologııasy ınstıtýty» ShJQ RMK molekýlalyq genetıka zerthanasynyń meńgerýshisi Erlan Turyspekov, «Nazarbaev Ýnıversıteti» DBBU Vıtse-prezıdenti Darhan Bilálov, Qazaqstan Respýblıkasy Prezıdentiniń janyndaǵy Qazaqstan Respýblıkasy Ulttyq ǵylym akademııasynyń basshysy Aqylbek Kúrishbaev bar.
Ulttyq ǵylym akademııasynyń akademıkterin saılaýdyń kelesi kezeńi aldaǵy aılarda ótedi.
«Saraptama nátıjeleri boıynsha eń kóp ball jınaǵan, baǵdarlamany qorǵaý nátıjeleri boıynsha eń joǵary baǵalaý kórsetkishine ıe bolǵan jáne akademıkterdiń Jalpy jınalysyna qatysýshylardyń jasyryn daýys berýi arqyly jalpy sanynyń keminde úshten ekisi daýys bergen úmitkerler ǵana akademıkter bolyp saılandy», – dedi Aqylbek Kúrishbaev.
