Asqar Jaldınov «5:32» serıalyn túsirgenderdi sotqa berdi
A. Jaldınovtyń aıtýynsha, «5:32» serıalyna arqaý bolǵan hıkaıalar onyń kitabynan ruqsatsyz alynǵan. Sotqa deıingi shaǵymdar Salem Social Media JShS-ǵa, rejısser Álisher Ýtevke jáne osy serıalda jumys istegen eki stsenarıstke jiberilgen.
Avtor serıaldyń premerasy 2021 jyly ótkenin, al kitap 2020 jyly jaryq kórgenin atap ótti.
«Ótken jyly sotqa bergen joqpyn, óıtkeni báleqor atanyp, daý-damaıdyń ortasynda júrgim kelmedi. Biraq, bıyl Salem Social Media kompanııasy men olardyń quryltaıshysy, Eýrazııa ónerkásiptik toby – ERG tarapynan jasalǵan is-áreketter meni osy sheshimdi qabyldaýǵa ıtermeledi jáne «sporttyq qyzyǵýshylyǵymdy» týdyrdy. Endi men óz aqıqatymdy sotta dáleldegim keledi jáne serıal túsirgenderdiń osyndaı óreskel áreketi úshin jazalanǵanyn qalaımyn. Sot talaby da jaqynda bolady», - dedi ol óziniń Instagram-daǵy paraqshasynda.
Aıta keteıik, «5:32» serıalynda qatygez adam óltirý qylmysyn ashyp, manıaktardy ustaǵan qazaqstandyq polıtseıler týraly baıandalady. Serıal 1990 jyldary bolǵan shynaıy oqıǵalarǵa negizdelgen. Basty rólderde Ábilmansur Serikov pen Marat Ámiraev oınaıdy.
