Asqar Zabıkýlınge Kókshetaýda eskertkish ornatyldy
KÓKShETAÝ. KAZINFORM - Astana qalasynda adamdardy órtten qutqarý kezinde qaza bolǵan órt sóndirýshi Asqar Zabıkýlınge Kókshetaý qalasynda eskertkish ornatyldy.
Eskertkish metsenat Rýslan Іrgebaevtyń bastamasymen jáne Aqmola oblysy ákimdiginiń qoldaýymen turǵyzylǵan. Onyń ashylýyna Aqmola oblysy ákiminiń birinshi orynbasary Eldos Ramazanov, QR Tótenshe jaǵdaılar vıtse-mınıstri general-maıor Baýyrjan Syzdyqov, Asqar Zabıkýlınniń otbasy, azamattyq qorǵaý organdarynyń ardagerleri jáne jeke quramy qatysty.
«Asqar erligimen Otan aldyndaǵy azamattyq boryshyna adaldyǵyn kórsetti. Onyń esimi men jarqyn beınesi qazaqstandyqtardyń júreginde máńgi qalady. Asqardyń erligi men batyldyǵy búgingi jastarǵa úlgi-ónege bolary sózsiz. Ol jaqsy ini ǵana emes, jaqsy áriptes, jaqsy joldas bola bildi. Іnimniń arýaǵyna osyndaı qurmet kórsetip otyrǵan azamattarǵa, otbasy atynan shynaıy alyǵysymdy bildiremin», - dedi órt sóndirýshiniń týǵan aǵasy Eldar Zabıkýlın.
Eskertkish Kókshetaý qalasyndaǵy Áýezov kóshesiniń boıynda ornalasqan alańqaıda ornatyldy.
Aıta keteıik, Aqmola oblysynyń týmasy Asqar Zabıkýlın 2022 jyldyń 16 qarashasynda elordada bolǵan órt kezinde óz ómirin qurban etip, janyp jatqan ottyń ishinen turǵyndardy alyp shyǵyp, erlikpen qaza tapqan edi.
Memleket basshysynyń tapsyrmasymen Astana qalasyndaǵy kóshelerdiń birine Asqar Zabıkýlınniń esimi berilip, bıýsti ornatylǵan bolatyn. Budan bólek, Astanadaǵy №6 mamandandyrylǵan órt sóndirý bóliminiń aýmaǵynda da onyń eskertkishi ornatylǵan, bul bólim órt sóndirýshiniń esimimen atalady.
