Asqar Zabıkýlındi eske alýǵa arnalǵan shaǵyn fýtboldan týrnır ótti
Aqmola oblysy Tótenshe jaǵdaılar departamentiniń baspasóz qyzmeti habarlaǵandaı, jarysqa Astana qalasy, Soltústik Qazaqstan, Qaraǵandy, Pavlodar, Qostanaı jáne Aqmola oblystarynyń tótenshe jaǵdaılar departamentteriniń komandalary qatysty.
Týrnır bastalar aldynda jınalǵandar Astana qalasy TJ departamentiniń órt sóndirýshisi Asqar Zabıkýlındi bir mınýt únsizdikpen eske aldy.
«Aqmola oblysy Tótenshe jaǵdaılar departamenti atynan Birjan sal aýdanynyń turǵyndary men ákimine osy jarysty Asqar batyrdyń týǵan jerinde ótkizýge múmkindik bergeni úshin jáne qatysýshylarǵa shaqyrýdy qabyl alyp, týrnırge qatysqany úshin alǵys aıtqym keledi. Búgingi sport merekesine qatysyp otyrǵan Asqardyń týǵan-týystaryna, dostary men áriptesterine úlken alǵysymdy bildiremin», - dedi Aqmola oblysy Tótenshe jaǵdaılar departamentiniń basshysy Nurlan Atyǵaev.
Jarys qorytyndysy boıynsha birinshi oryndy qaraǵandylyq qutqarýshylar, ekinshi oryndy Pavlodar oblysy, al úshinshi oryndy aqmolalyq qutqarýshylar ıelendi.
Aıta keteıik, 2022 jyldyń 16 qarashasynda Astanada 15 qabatty úıden órt shyqty. Saldarynan 3 adam, onyń ishinde bir bala aýrýhanaǵa tústi. Birneshe adamdy qutqarǵan órt sóndirýshi Asqar Zabıkýlınniń denesin 80% kúıik shalyp, jansaqtaý bólimine jatqyzyldy. 20 qarashada ol astanalyq aýrýhanada qaıtys boldy. Dárigerler onyń ómiri úshin birneshe kún kúresken bolatyn.
Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.
Asqar Zabıkýlın I dárejeli «Aıbyn» ordenimen marapattaldy. 20 jeltoqsanda oǵan «Altyn adam» syılyǵy tabys etildi.
28 jeltoqsanda Astana qalalyq máslıhaty sheshimimen erlikpen qaza tapqan órt sóndirýshi Asqar Zabıkýlınniń esimi jańa kóshege berildi.
