Asqar Ýmarov: Prezıdenttik jastar kadr rezervine irikteý ashyq ótti
«Jaqynda Prezıdenttik jastar kadr rezervine irikteýdiń qorytyndy kezeńi ótken bolatyn. Men kandıdattarmen áńgimelesetin Sarapshylar komıssııasynyń quramyna baqylaýshy retinde engen edim. Sondaı-aq, Marat Bashımov, Artýr Platonov, Danııar Áshimbaev jáne basqa da tanymal sarapshylar, qoǵam qaıratkerleri de baqylaýshy boldy. Al komıssııa quramy QR Prezıdenti Ákimshiligi, Memlekettik qyzmet isteri jónindegi agenttik, sonymen qatar akademııalyq orta ókilderinen jasaqtalǵan. Jalpy alǵanda barlyq jumys tsıfrlyq tehnologııalar qoldanyla otyryp, jetkilikti deńgeıde ashyq ótti, ıaǵnı daýys quqyǵyna ıe komıssııanyń árbir múshesine jeke-jeke planshetter berilgen, olar irikteý barysynda kandıdattarǵa qatysty kórsetkishterdi birden qoıyp, baǵa berip otyrdy. Bul rette Memlekettik qyzmet isteri jónindegi agenttik tarapynan jumystardyń jaqsy uıymdastyrylǵanyn da atap ótkim keledi. Іrikteýge asa belsendi, bilimi tereń jastar qatysty, osynyń ózi komıssııa múshelerine baǵa berýde qıyndyq týdyrǵany málim. Soǵan qaramastan, meniń oıymsha, komıssııa eń úzdikterdi tańdaı aldy. Jalpy alǵanda 330 jas iriktelgen, endi osy jas mamandardyń 300-i prezıdenttik jastar kadr rezervine engizýge usynylady. Al odan ary qaraı rezervke engen tulǵalar elimizdegi memlekettik qyzmet salasynyń jańarýy men jańǵyrýyna jumys isteıdi», - dedi A.Ýmarov.
Onyń aıtýyna qaraǵanda, komıssııa eki apta boıy saǵat 9:00-den 19:00-ge deıin tapjylmaı otyryp jumys istedi. Árbir úmitkerge shamamen 7 mınýt bólindi, osy ýaqyt ishinde komıssııa músheleri suraq qoıyp, alǵan jaýaptary boıynsha sheshim qabyldap, ony ózderiniń qolyndaǵy planshette belgileýge úlgerip otyrýy tıis boldy.
Eske sala keteıik, QR Prezıdenti Qasym-Jomart Toqaev óziniń saılaý aldyndaǵy baǵdarlamasynda Prezıdenttik jastar kadr rezervin qurý qajettigin aıqyndap, mundaı rezerv jastar úshin tıimdi áleýmettik lıft bolýy kerektigin atap ótken edi.
Rezervke irikteý jumysyna memlekettik qyzmetkerler, kvazımemlekettik sektor, jeke sektor jáne azamattyq qoǵam ókilderi qatysty. Úmitkerlerdi tirkeý bıylǵy jyly 1-30 qyrkúıek aralyǵynda ótti. Negizgi talap boıynsha kandıdat jasy 35-ten aspaǵan Qazaqstan Respýblıkasynyń azamaty bolyp, bilimi men jalpy eńbek ótili 5 jyldan kem bolmaýy tıis edi.
Úmitkerlerdi irikteý 6 kezeń boıynsha ótti. Birinshi kezeń – qujat qabyldaý. Ekinshi kezeń – kandıdattardyń kúrdeli mátindik jáne sandyq aqparattarmen jumys isteý múmkindikterin anyqtaýǵa arnalǵan testileý. Úshinshi kezeń – testiler qorytyndysy. Tórtinshi kezeń - kandıdattyń áleýetin, sonyń ishinde onyń lıderlik qasıetin, strategııalyq oılaý deńgeıin, motıvatsııa men qundylyq boıynsha baǵalaý. Bul kezeńde úmitkerler esse jazyp, ózderiniń áleýmettik mánge ıe jobalaryn tanystyrdy, al adam resýrstary salasyndaǵy arnaıy sarapshylar qatysýshylardyń quzyretin baǵalady. Besinshi kezeń – úmitkerler Sarapshylar komıssııasynda áńgimelesýden ótti. Bul etapqa osyǵan deıingi kezeńderde ball jıyntyqtary boıynsha úzdik nátıje kórsetkender jiberildi.
Aıta keteıik, búgin Ortalyq kommýnıkatsııalar qyzmetindegi baspasóz máslıhatynda QR Prezıdenti Ákimshiligi Basshysynyń orynbasary Máýlen Áshimbaev Prezıdenttik jastar kadr rezervine engen 300 qazaqstandyqtyń anyqtalǵanyn jarııa etti.
