Asqar Shákirov sheteldik parlamentshilerdi Qazaqstanmen yntymaqtastyqty keńeıtýge shaqyrdy
NUR-SULTAN. QazAqparat – QR Parlamenti Senaty Tóraǵasynyń orynbasary Asqar Shákirov Eýrazııa elderi parlamentteri spıkerleriniń 4-shi «Úlken Eýrazııa. Únqatysý. Áriptestik» keńesi aıasynda birqatar ekijaqty kezdesýler ótkizdi.
Bul týraly QR Parlamenti Senatynyń baspasóz qyzmeti habarlady.
Ispanııa Koroldigi Senatynyń Syrtqy ister komıtetiniń tóraǵasy A.Gýtıerrıspen kelissózder barysynda memleketaralyq qatynastardyń joǵary deńgeıi, sondaı-aq Qazaqstan men Ispanııa parlamentshileri arasyndaǵy yntymaqtastyqty damytýdyń áleýeti atalyp ótti.
Qazaqstan ókili Ispanııa Koroldigi elimizdiń Eýroodaqtaǵy senimdi strategııalyq áriptesi ekenin atap ótti.
«Qazaqstan EYQU parlamenttik assambleıasy men Eýropa Keńesiniń jumysyna qatysý aıasyndaǵy ıspandyq parlamentshilermen baılanysty damytýǵa múddeli», - dedi A.Shákirov.
Ispanııalyq senator óz kezeginde Koroldiktiń joǵarǵy palatasynda Qazaqstanmen dostyq tobyn qurýǵa nıetti ekenin jetkizdi.
Indonezııa Respýblıkasy Halyqtyq ókilderi keńesi Tóraǵasynyń orynbasary Fadlı Zonmen jáne Aımaqtar ókilderi keńesi tóraǵasynyń orynbasary Darmaıantı Lıýbıspen kezdesýde ekijaqty yntymaqtastyq máseleleri talqylandy.
Asqar Shákirov ıslamdyq qarjylandyrý salasyndaǵy Indonezııanyń mol tájirıbesin atap ótip, Qazaqstan «Astana» halyqaralyq qarjy ortalyǵynyń qyzmetine ındonezııalyq qarjy ınstıtýttaryn qatysýǵa tartýǵa múddeli ekenin aıtty.
F.Zon Indonezııa elordany kóshirý jónindegi Qazaqstandyq tájirıbeni paıdalanýǵa ázir ekenin jetkizdi.
A.Shákirov Pákistan Islam Respýblıkasy Parlamenti Senaty tóraǵasynyń orynbasary Salım Mandvıýallamen kezdesýde «Qazaqstan men Pákistan qatynastary ashyqtyǵy men birizdiligimen erekshelenedi», - dedi.
«ShYU men AÓSShK aıasyndaǵy tyǵyz yntymaqtastyq kópjaqty sıpattaǵy úılesimdi jumystyń aıqyn mysaly bolyp tabylady. Bizdiń ózara senimimiz aımaqtyq yntymaqtastyqty odan ári nyǵaıtýǵa jáne atalǵan halyqaralyq alańdardyń áleýetin arttyrýǵa yqpal etetinine senimdimin», - dedi senator.
Salım Mandvıýalla óz kezeginde spıkerlerdiń 4-keńesine shaqyrylǵany úshin alǵys bildirip, Pákistan Qazaqstannyń Parlamentimen tyǵyz baılanys jasaýǵa ázir ekenin rastady. Áńgime barysynda Pákistan ókili Asqar Shákirovke eline saparmen kelý shaqyrýyn tabys etti.
Júzdesýshiler eki el arasyndaǵy ekonomıkalyq, mádenı-gýmanıtarlyq baılanystardy óristetý jóninde pikir bildirdi.
Senat Tóraǵasynyń orynbasary Rýmynııa Depýtattar palatasy tóraǵasynyń orynbasary Florın Iordakemen kezdesýde Memleket basshysy Q.Toqaev týrızmdi damytý mindetin qoıǵanyn atap ótti.
«Qazaqstan basqa eldermen saýda-ekonomıkalyq qatynastardy damytýǵa ázir. Álem elderiniń Parlamentteri jańa sapalyq deńgeıge ótti. Biz Rýmynııamen ózara tıimdi sharttarda parlamentaralyq baılanystardy jalǵastyrýǵa múddelimiz», - dedi A.Shákirov.
F.Iordake Qazaqstan Rýmynııanyń senimdi áriptesi bolyp tabylatynyn jáne qazaqstandyq taýarlardy Eýropa naryǵyna ilgeriletetin kópiri bolýǵa múddeli ekenin atap ótti. Aýyl sharýashylyǵy, ınnovatsııalar men tehnologııa, ekologııa men týrızmdi yntymaqtastyqtyń basym salalary dep belgiledi.
Asqar Shákirov Palestına Ulttyq keńesiniń Bas hatshysy Muhammed Mussa Sobeıhpen kezdesýde halyqaralyq isterdegi Parlamentterdiń rólin kúsheıtýdiń mańyzyn atap ótti. «Eýrazııa elderi parlamentteri spıkerleriniń kezdesýi aıasyndaǵy únqatysý alańy pikir almasýdyń mańyzdy minberi bolyp tabylady. Qazaqstan kez kelgen qaqtyǵystardy beıbit jolmen sheshýdi jaqtaıdy. Qazaqstan Taıaý Shyǵystaǵy shıelenisterdi retteýge belsendi qatysýshy bolyp tabylady. Biz ekijaqty baılanystardy odan ári keńeıtýge ázirmiz», - dedi Qazaqstan Senaty Tóraǵasynyń orynbasary.
Palestına Ulttyq keńesiniń Bas hatshysy óz kezeginde Palestına álemde beıbitshilik bastamasyn qoldaıtynyn jáne Taıaý Shyǵysta beıbitshilik pen turaqtylyqty saqtaýǵa bar kúsh-jigerin jumsaýǵa ázir ekendikterin jetkizdi.
Al senator Olga Perepechına Horvatııa tájirıbesi negizinde týrızmdi damytýdy usyndy.
Eýrazııa elderi parlamentteri spıkerleriniń keńesi barysynda Parlament Senaty Qarjy jáne bıýdjet komıtetiniń tóraǵasy Olga Perepechına Horvatııa Respýblıkasy Saborynyń Densaýlyq saqtaý jáne áleýmettik saıasat máseleleri jónindegi komıteti tóraǵasynyń orynbasary Ivan Chelıch ekijaqty yntymaqtastyqty damytý, saıası únqatysýlarǵa qarqyn berý jáne ekonomıkalyq jáne mádenı-gýmanıtarlyq yntymaqtastyqty óristetý máselelerin talqylady.
«Bizdiń elderimizdiń ekonomıkalary birin-biri tolyqtyrady jáne áriptestik eki tarapqa da paıda ákele alady. Bizdiń aldymyzda saýda-ekonomıkalyq yntymaqtastyq deńgeıin arttyrýdyń mańyzdy mindeti tur», - dep atap ótti O.Perepechına.
Senator sondaı-aq týrızm ındýstrııasyn damytý jónindegi yntymaqtastyq pen tájirıbe almasýǵa nazar aýdardy.
Horvatııa Respýblıkasy Sabor Komıtetiniń tóraǵasy Ivan Chelıch Qazaqstan Parlamentimen tyǵyz yntymaqtastyqty damytýǵa múddeli ekenin atap ótti.
«Bizdiń Soborda Qazaqstanmen parlamentaralyq dostyq toby quryldy. Parlamenttik delegatsııalardyń saparlarymen almasý bizdiń saıası únqatysýymyzdy keńeıtip qana qoımaı, ózara is-qımyldyń barlyq baǵyttary boıynsha ekijaqty qarym-qatynastardy ilgeriletýge múmkindik beredi», - dedi I.Chelıch.
2020 jyldyń birinshi jartysynda Horvatııa Eýropalyq Odaqtaǵy joǵary jáne jaýapty qyzmetti – tóraǵalyqty alǵash ret qabyldaıdy.
Senator Olga Perepechına joǵary jáne jaýapty mıssııany tabysty júzege asyrýda osy elge tilektestigin bildirdi.
