Asqar Shákirov: Parlamentarııler genderlik teńdikti ilgeriletýge járdemdesýi kerek
Onlaın dıalogqa qatysýshylar janjaldardyń aldyn alý men sheshýdegi, bitimgershilikke, áıelder men qyzdardy genderlik teńsizdikten qorǵaýǵa áıelderdiń tolyq jáne mańyzdy qatysýyn qamtamasyz etýdegi Parlamenttik assambleıa men ulttyq parlamentterdiń rólin talqylady.
EQYU Parlamenttik Assambleıasynyń vıtse-prezıdenti Asqar Shákirov óz sózinde áıelderdiń quqyqtaryn jan-jaqty qorǵaý, olarǵa qatysty zorlyq-zombylyq pen kemsitýshilikti joıý, sondaı-aq áıelderdi bılik qurylymdarynda ilgeriletý EQYU-ǵa múshe memleketterdiń damýyndaǵy mańyzdy basymdyq bolyp tabylatynyn atap ótti.
«Qazaqstan genderlik teńdikti qamtamasyz etý baǵytynda BUU-nyń Myńjyldyq damý maqsattaryna merziminen buryn qol jetkizdi jáne TMD elderi arasynda Genderlik damý ındeksi boıynsha kóshbasshy bolyp tabylatyn «genderlik damý deńgeıi óte joǵary» elderdiń qataryna kiredi»,- dedi vıtse-spıker.
Ol Prezıdent Qasym-Jomart Toqaevtyń saılaýdaǵy saıası partııalardyń kandıdattary tiziminde áıelder men jastar úshin 30 paıyzdyq kvota engizý jónindegi bastamasynyń mańyzdylyǵyn atap ótti. Bul Parlament Májilisindegi áıelder ókildigin 27%-ǵa deıin ulǵaıtýǵa múmkindik berdi.
Áıelderdiń shaǵyn jáne orta bıznestiń 43%-yn basqaratynyn eskere kele jumys oryndaryn qurýdaǵy jáne ekonomıkalyq ósýdi yntalandyrýdaǵy mańyzdy róli atap ótildi.
Qazaqstandyq áskerı qyzmetshi áıelder erlermen qatar BUU mıssııasy sheńberinde janjaldan keıingi elderde beıbit ómirdi qalpyna keltirýdiń bitimgershilik baǵdarlamalaryna qatysady.
Qorytyndylaı kele, qazaqstandyq senator EQYU parlamentarıılerin áıelder ókildigi máselelerinde úlken tepe-teńdikti qamtamasyz etýge, áıelderdiń óz múmkindikterin tolyq iske asyrýy úshin qolaıly jaǵdaılar jasaýǵa jáne áleýetin arttyrýǵa járdemdesýge shaqyrdy.
