Asqar Shákirov Parlament Tóraǵalary Eýropa konferentsııasynyń jumysyna qatysty
NUR-SULTAN. QazAqparat - Qazaqstan Respýblıkasy Parlamenti Senaty tóraǵasynyń orynbasary Asqar Shákirov Eýropa Keńesi Parlamenttik assambleıasynyń (EKPA) aıasynda Strasbýrg qalasynda Parlament Tóraǵalarynyń Eýropa konferentsııasynyń jumysyna qatysty. Bul týraly Joǵary Palatanyń baspasóz qyzmeti habarlaıdy.
Eýropa Keńesine múshe 47 memlekettiń, áriptes jáne baıqaýshy elderdiń parlamentteriniń basshylary, sondaı-aq birqatar halyqaralyq parlamenttik assambleıalardyń basshylary qatysqan forým Eýropa Keńesiniń qurylǵanyna 70 jyl tolýyna arnaldy. Kún tártibi boıynsha ortaq eýropalyq úıdiń qalyptasýy men damýy, Parlamentterdiń Ornyqty damý maqsattaryna qosqan úlesi, sondaı-aq genderlik teńdik máseleleri boıynsha pikirsaıys boldy.
A.Shákirov Strasbýrgte bolǵan kezde EKPA Tóraǵasy Lılıan Morı Paskemen kelissóz júrgizdi. Taraptar Qazaqstannyń osy uıymmen ózara is-qımyl jasaýdaǵy ózara túsinistik pen senimdi atap ótti. Ekijaqty ózara is-qımyldyń is júzindegi pármendi mysaldarynyń biri retinde Venetsııa komıssııasymen tıimdi yntymaqtastyq, sondaı-aq elimizdiń GRECO-ǵa kirýi (Sybaılas jemqorlyqqa qarsy is-qımyl jasaý jónindegi memleketterdiń toptary) atalyp ótildi.
Lılıan Morı Paske Nur-Sultan qalasynda Eýropa Keńesiniń Ortalyq Azııa elderine arnalǵan aımaqtyq ókildiginiń ashylýyn qoldaıtynyn jetkizdi.
Tóraǵa orynbasary sondaı-aq Belgııa Koroldigi Ókilderi palatasy Tóraǵasynyń orynbasary A.Flaomen kelissóz ótkizdi, kelissóz barysynda ekijaqty saýda-ekonomıka jáne ınvestıtsııa salalaryndaǵy yntymaqtastyqtyń qarqyndy damýy týraly aıtyldy. Belgııa parlamentshileri taıaý ýaqytta Qazaqstan-Belgııa dostyǵy parlamentaralyq tobynyń saılaýdan keıingi jańa belgııalyq quramy qurylatynyn habarlady. Taraptar bul turǵyda Qazaqstan Respýblıkasy men Eýropa Odaǵy arasyndaǵy Keńeıtilgen áriptestik týraly kelisimniń kúshine enýi aıasynda memleketterdiń zań shyǵarýshy organdarynyń ózara tıimdi is-qımylynyń mańyzdy ekenin atap ótti.
Parlamentaralyq odaqtyń Tóraǵasy Gabrıella Kýevas Barronmen de kezdesý boldy. Kezdesý barysynda aldaǵy 2020 jyly Nur-Sultan qalasynda ótetin Dúnıejúzilik saýda uıymy parlamenttik konferentsııasynyń máseleleri talqylandy. Parlamentaralyq Odaqtyń basshysy osy sharanyń Qazaqstanda ótýine alǵysyn bildirdi.
Forým alańynda Qazaqstan Respýblıkasy Parlamenti Senaty Tóraǵasynyń orynbasary EQYU Parlamenttik Assambleıasynyń Tóraǵasy Georgıı Tseretelımen, Ázerbaıjannyń, Túrkııanyń, Kıprdiń, Lıhtenshteınniń jáne Shvetsııanyń, Eýropa Keńesiniń janyndaǵy dıplomatııalyq mıssııanyń delegatsııalarynyń basshylarymen de kezdesti.
Parlament Tóraǵalarynyń Birinshi Eýropalyq konferentsııasy 1975 jyly ótken bolatyn. Bul shara eki jylda bir ret, kezekpen Strasbýrgte jáne Eýropa Keńesine múshe memleketterdiń biriniń astanasynda ótedi.
