Asqar Shákirov óńir máslıhattarynyń hatshylarymen kezdesti

NUR-SULTAN. QazAqparat – QR Parlamenti Senaty tóraǵasynyń orynbasary Asqar Shákirov oblystardyń, Nur-Sultan, Almaty jáne Shymkent qalalary máslıhattarynyń hatshylarymen kezdesý ótkizdi, dep habarlaıdy QazAqparat.

«Sharaǵa qatysýshylar osy jyldyń sáýir aıynda Senat tóraǵasy Darıǵa Nazarbaevanyń ortalyq memlekettik jáne jergilikti organdardyń basshylarymen ótkizgen kezdesý qorytyndysy boıynsha ázirlengen usynymdardy júzege asyrý barysyn talqylady. Usynymdar máslıhat qyzmetterin zańnamalyq jetildirý jáne is júzinde retteýge qatysty boldy», - dedi palatanyń baspasóz qyzmetinen.

Senat tóraǵasynyń orynbasary jergilikti memlekettik basqarý jáne ózin-ózi basqarý júıesindegi, atap aıtqanda el aımaqtarynyń turaqty damýyn qamtamasyz etýdegi máslıhat depýtattarynyń mańyzdy rólin atap ótti. A.Shákirov bul rette Parlament Senaty óz qyzmetinde aımaqtardy damytý máselelerinde zań shyǵarýda jergilikti ókildi organdarmen is-qımyldy nyǵaıtýǵa erekshe nazar aýdaratynyn aıtty. Kezdesýge qatysýshylar Parlamenttiń joǵarǵy palatasynda jumys istep kele jatqan Jergilikti ókildi organdarmen ózara is-qımyl jasaý jónindegi keńestiń jáne «Óńir» depýtattyq tobynyń qyzmetine oń baǵa berdi.

«Máslıhat depýtattary óz kezeginde qyzmetterin quqyqtyq, uıymdastyrýshylyq jáne basqa da qamtamasyz etýge baılanysty óz mindetterin iske asyrý máselelerine nazar aýdardy. Aımaq máslıhattary saılaǵan Senat depýtattarynyń saılaýshylarmen ózara baılanysy men barlyq deńgeıdegi depýtattardyń azamattyq qoǵammen jáne turǵyndarmen ózara is-qımylyn jetildirý máselelerine aıryqsha kóńil bólindi», - delingen Senat aqparatynda.

Kezdesýge sondaı-aq Parlament Senatynyń depýtaty, «Qazaqstan máslıhattary depýtattarynyń birlestigi» RQU tóraǵasy Tóleýbek Muqashev, Senat depýtaty, «Óńir» depýtattyq tobynyń basshysy Mıhaıl Bortnık qatysyp, óz oılaryn ortaǵa saldy.