Asqar Shákirov ónerkásiptik qaýipsizdikke qatysty pikir bildirdi

NUR-SULTAN. QazAqparat – Búgin Senatta ónerkásiptik qaýipsizdikti qamtamasyz etý taqyrybyndaǵy Úkimet saǵatynda Palata tóraǵasynyń orynbasary Asqar Shákirov kásiporyndardaǵy negizgi máselelerdi aıtty, dep habarlaıdy QazAqparat tilshisi.

Sońǵy 5 jylda qadaǵalanatyn sýbektiler sany az ǵana ósse de ónerkásip kásiporyndaryndaǵy apattar 30%-ǵa arta túskeni jáne jaǵdaıǵa taldaý jasaǵanda óndiristerde tehnogendik avarııalardyń týyndaý qaýpi burynǵysynsha joǵary deńgeıde qalyp otyrǵany atap ótildi.

«Memleket basshysy Qasym-Jomart Toqaev halyqqa Joldaýynda elimizdiń ónerkásiptik áleýetin ashý, onyń ishinde strategııalyq mańyzdy óndiristerdi, negizgi eksporttyq basymdyqtardy aıqyndaý, sondaı-aq ónerkásipti qoldaý sharalaryn shynaıy istermen tolyqtyrý jóninde naqty tapsyrmalar berdi. Osyǵan baılanysty uıymdyq mádenıettiń bir bóligi sanalatyn óndiristegi qaýipsizdiktiń joǵary mádenıetin qalyptastyrý, qoldaý jáne damytý qajet dep sanaımyz. Óıtkeni ol óndiristik jáne ekonomıkalyq maqsattardan basym bolyp, barlyq qyzmet túrleriniń jalpyǵa birdeı jáne ajyramas bóligi bolýy tıis», - dedi Asqar Shákirov.

Jaqynda Qaraǵandy oblysynyń «Abaı» shahtasynda bolǵan tótenshe jaǵdaı sekildi qaıǵyly oqıǵalardyń qaıtalanbaýy úshin ónerkásip qaýipsizdigi salasyndaǵy problemalardy sheshý asa mańyzdy.

Osy aımaqtan saılanǵan senator Sergeı Ershov qazir ónerkásip qaýipsizdigi salasyndaǵy jaǵdaıdy jaqsartýǵa baǵyttalǵan zańnamalyq bastamalardy qaraý eń ótkir másele dep sanaıdy.

«Ýákiletti organǵa qaýipti óndiris obektilerin jańartý men tehnıkalyq qaıta jaraqtandyrýdyń birlesken josparyn jasaý men bekitý jóninde tıisti mindetterdi bere otyryp, qaýipti óndiris obektilerin paıdalanatyn uıymdarǵa tehnıkalyq qaıta jaraqtandyrýdyń birlesken josparyn oryndaý jáne birinshi basshyǵa tikeleı baǵynatyn óndiristik jeke baqylaý qyzmetin qurýǵa qajetti sharalar qabyldaý mindetterin bekitý qajet», - dep atap ótti senator óz sózinde.

Parlamentshiler sonymen qatar ónerkásip qaýipsizdigi salasyndaǵy kadrlardyń ótkir tapshylyǵyn, ınspektorlar quramynyń qysqarýyn, sondaı-aq osy salada ǵylymı-zertteý qyzmetiniń tıisti dárejede júrgizilmeı kele jatqanyn atap ótti.

Budan buryn habarlanǵandaı, Tótenshe jaǵdaılar mınıstri «Abaı» shahtasyndaǵy apatqa pikir bildirdi.