Asqar Shákirov: Qazaqstan Parlamenti EKPA-men yntymaqtastyqty nyǵaıtýǵa múddeli
Senatorlar Assambleıanyń plenarlyq sessııasyna jáne komıtetterdiń jumysyna qatysty, dep habarlaıdy QazAqparat QR Parlamenti Senatynyń baspasóz qyzmetine silteme jasap.
Tóraǵa orynbasary shara aıasynda Parlamenttik Assambleıanyń Tóraǵasy Rık Demspen, Eýropa Keńesi Bas hatshysynyń orynbasary Bern Bergemen, EKPA Saıası komıtetiniń tóraǵasy Jolt Nemetpen, Birikken solshyl kúshterdiń saıası tobynyń jetekshisi Tını Kokspen kelissózder júrgizdi.
Eýropalyq áriptester Memleket basshysynyń strategııalyq bastamalarymen, onyń ishinde demokratııalyq protsesterdi odan ári damytý jáne elimizdiń qoǵamdyq-saıası ómirine azamattardyń qatysý múmkindikterin keńeıtý baǵyttarymen tanystyryldy.
Parlamenttik Assambleıa Tóraǵasymen kezdesý barysynda Qazaqstannyń EKPA-men parlamentaralyq yntymaqtastyǵyn odan ári nyǵaıtý máseleleri talqylandy.
Rık Dems Memleket basshysynyń saıası bastamalaryn, atap aıtqanda parlamenttik oppozıtsııa ınstıtýtyn, partııalyq tizimdegi áıelder men jastarǵa arnalǵan kvotany, genderlik teńdik jáne ólim jazasyn joıýdy zańnamalyq turǵyda engizýdi joǵary baǵalady.
EKPA Tóraǵasy Qazaqstanǵa osy jyly resmı saparmen kelýge ázir ekenin jetkizdi. «Ózara múdelilik týǵyzatyn salalarda syndarly is-qımyldy damytý maqsatynda EKPA men Qazaqstandy jaqyndastyrý jónindegi jumystardy jalǵastyrý mańyzdy», - dedi Rık Dems.
Senator Álı Bektaev Teńdik jáne kemsitpeýshilik jónindegi komıtettiń otyrysynda elimiz basshylyǵynyń áıelder quqyǵyn qorǵaý jáne genderlik teńdik máselelerin ilgeriletý jónindegi sharalary týraly aıtyp berdi.
Parlamenttik delegatsııa Strasbýrgte Qazaqstan Táýelsizdiginiń 30 jyldyǵyna arnalǵan saltanatty qabyldaýǵa qatysty. Kesh aıasynda Qazaqstannyń jas daryndarynyń qatysýymen fotokórme men kontsert boldy. Sharaǵa EKPA-ǵa múshe elderdiń parlamenttik delegatsııalary jáne Eýropa Keńesiniń ókilderi qatysty.
Saltanatty keshtiń ashylýynda sóz sóılegen Senat Tóraǵasynyń orynbasary Qazaqstan Táýelsizdik jyldary halyqaralyq arenada tanymal turaqty jáne bedeldi memleketke aınalǵanyn atap ótti. «Táýelsizdiktiń úsh onjyldyǵy Qazaqstan úshin ekonomıkalyq progress pen ornyqty damý dáýirine aınaldy. Bizdiń elimiz postkeńestik keńistiktegi eń tabysty ári aýqymdy naryqtyq reformalardy júzege asyrýda kóshbasshy boldy», - dedi senator.
EKPA Vıtse-prezıdentteri Kımmo Kılıýnen men Arkadıýsh Mýlarchek bizdiń memleketimizdiń qalyptasýyna Tuńǵysh Prezıdent-Elbasy Nursultan Nazarbaevtyń qosqan zor úlesin atap ótip, Prezıdent Qasym-Jomart Toqaevtyń qazirgi ýaqytta júzege asyp jatqan jan-jaqty reformalaryna tolyqtaı qoldaý bildirdi.
EKPA parlamentshileri qaýipsizdikti qamtamasyz etýdiń jańa sıpatyn ilgeriletýge yqpal etken Qazaqstannyń BUU Qaýipsizdik Keńesindegi turaqty emes múshe retindegi jáne EQYU-ǵa tóraǵalyq etýindegi tabysty qyzmetin atap ótip, Eýropa Keńesimen jáne onyń Parlamenttik Assambleıasymen syndarly yntymaqtastyǵyna úmit artatynyn jetkizdi.
