Asqar Omarov Úkimet jumysyna jurtshylyq pen BAQ synynyń sebepterin atady

NUR-SULTAN. QazAqparat – Memlekettik organdardyń jumysyn BAQ-ta keńinen túsindirýge arnalǵan taqyryptar boıynsha aqparattar az beriledi. Bul týraly Úkimet otyrysynda QR Aqparat jáne qoǵamdyq damý mınıstri Asqar Omarov aıtty, dep habarlaıdy QazAqparat tilshisi.

«Qazirgi ýaqytta Memleket basshysynyń tapsyrmalaryn oryndaý boıynsha QR Úkimetiniń qyzmetine jurtshylyqtyń joǵary qyzyǵýshylyǵy baıqalady. Alaıda jekelegen ózekti taqyryptar boıynsha tirkeletin azamattardyń keri baılanysy kóbinese teris sıpatqa ıe bolady», - dedi mınıstr.

Osy rette mınıstr jurtshylyq pen BAQ ókilderi tarapynan synnyń bolý sebepterin atady.

«Birinshiden, memlekettik organdardyń jumysyn BAQ-ta keńinen túsindirýge arnalǵan taqyryptar boıynsha aqparattyń az berilýi. Ekinshi, jeke jáne zańdy tulǵalardyń, sondaı-aq BAQ-tyń resmı saýaldary men suranystaryna beriletin jaýaptarda tolyq aqparattyń bolmaýy. Úshinshiden, BAQ-ta týyndaǵan máselelerdi túsindirý boıynsha biliktiligi tómen spıkerlerdi usyný. Aqparattyq-túsindirý jumysynyń mańyzdylyǵyn eskere otyryp, atalǵan faktorlardy memlekettik organdardyń jumysynda eskerý qajet», - dedi Asqar Omarov.