Asqar Myrzahmetov Jambyl oblysynyń qurmetti azamaty atandy

TARAZ. QazAqparat – Taraz qalasyndaǵy «Balasaǵun» ortalyq kontsert zalynda Táýelsizdik kúnine arnalǵan saltanatty jıyn ótti. Onda aımaq basshysy Berdibek Saparbaev óńir turǵyndaryn kele jatqan merekemen quttyqtady, dep habarlaıdy QazAqparat tilshisi.

Budan soń oblys ákimi aımaqtyń damýyna úles qosqan jambyldyqtarǵa nagradalar tapsyrdy.

ІІ dárejeli «Dostyq» ordenimen Qordaı aýdany Sortóbe aýyldyq okrýginiń ákimi Іlııas Býlarov jáne M.Qashqarı atyndaǵy uıǵyr etnomádenı birlestiginiń tóraǵasy Muhabat Turdyeva marapattaldy.

Al, «Qurmet» orenine «Merke irimshik zaýyty» JShS dırektory Dastan Aıtólenov, Jýaly aýdandyq ardagerler keńesiniń tóraǵasy Estemes Amanbekov, «Agrofırma Túrikpen» JShS bas dırektory Baýyrjan Ábildaev, K.Ázirbaev atyndaǵy oblystyq fılarmonııanyń ártisi Anna Výnder, «Altais Group» JShS prezıdenti Álimbek Jumabaev, ómirlik qıyn jaǵdaıǵa tap bolǵan balalardy qoldaý ortalyǵynyń dırektory Aıjan Meıirhanova, Jýaly aýdandyq máslıhatynyń hatshysy Erǵalı Tileýbekov jáne eńbek ardageri Şors Sharafýtdınov ıe boldy.

Sondaı-aq, II dárejeli «Eńbek dańqy» ordenin oblys ákiminiń qolynan «Qazfosfat» JShS «Qarataý» taý-ken óńdeý kesheniniń bas ınjeneri Muhamedııar Áripbaev, «QTJ Júk tasymaly» AQ fılıaly Shý lokomotıv paıdalaný deposynyń teplovoz mashınısi Tólegen Barlybaev, «Qyzyl-Dıhan qojalyǵy» óndiristik kooperatıviniń mehanızatory Nıkolaı Ivkın, «Igilik» kópsalaly kásipornynyń kranshysy Rysqalı Maısýpov jáne «Qazfosfat» JShS Mıneraldy tyńaıtqyshtar zaýyty ammofos tsehynyń apparatshysy Dúısen Shynqojaev aldy.

Sonymen qatar, «Jambyl oblysynyń qurmetti azamaty» ataǵy memleket jáne qoǵam qaıratkeri, «Parasat» jáne «Qurmet» ordenderiniń ıegeri Asqar Myrzahmetovke, medıtsına ǵylymdarynyń doktory, oblystyq kópbeıindi aýrýhanasynyń hırýrgııa bóliminiń meńgerýshisi Saǵyndyq Ordabekovke, K.Ázirbaev atyndaǵy oblystyq fılarmonııanyń Qazaq ulttyq aspaptar orkestriniń dırıjeri Muhtarbaı Rahmanqulovqa, «Qazfosfat» JShS «Qarataý» jáne «Sholaqtaý» fılıaldarynyń dırektory Muratqalı Sársenovke jáne Qazaqstan fýtbol federatsııasy prezıdentiniń keńesshisi Seıdildá Baıshaqovqa berildi.

Óz kezeginde Asqar Myrzahmetov jambyldyqtarǵa ystyq yqylasy men kórsetken qoldaýy úshin alǵys aıtty.

«Maǵan áli kúnge deıin oblys turǵyndarynan alǵys-lebizder túsýde. Árıne, bul - úlken qurmet. Biz birlese otyryp oblys úshin kóp is tyńdyrdyq. Alda tek jaqsylyqtar bolady dep senemin. Marapat úshin rahmet, bul - men úshin úlken mártebe», - dedi ol.

Kesh baǵdarlamasy K.Ázirbaev atyndaǵy oblystyq fılarmonııasynyń ujymy ázirlegen merekelik kontsertke ulasty.