Asqar Myrzahmetov turmysty jaqsartý jobasyna engen aýyldardy aralady
Óńir basshysy buǵan deıin Jambyl, Jýaly, Baızaq, Talas, Shý aýdandaryna jumys saparymen barǵan bolatyn. Bul joly Qordaı aýdanyndaǵy Jambyl aýyldyq okrýg turǵyndarymen kezdesti.
Kezdesý barysynda aýyldyqtardyń joba boıynsha qolǵa alyp jatqan jumystary baıandaldy. Okrýg ákimi Aıdar Birimqulov jobanyń bes baǵyty boıynsha jeke-jeke toqtalyp, turǵyndardyń usynys-nıetterin tilge tıek etti.
Aıta keteıik, jobanyń pılottyq kezeńine engen Jambyl aýyldyq okrýgine eki eldi meken qaraıdy. Onda barlyǵy 1054 aýlada, 6845 adam turady. Ol aýlalardaǵy jalpy jer kólemi 105 gektardy qurasa, sýmen qamtylǵany 634 aýla, ıaǵnı 79 gektar.
Búginde aýyldaǵy birinshi baǵyt boıynsha nesıege ótinim berip úlgergen 472 aýlanyń jer kólemi 62 gektarǵa teń. Turǵyndar úı irgesindegi jerlerine negizinen askók, sarymsaq, shalǵam, kartop, qyzynaq, qııar egýge yqylas tanytyp otyr. Jambyldyqtar aıanbaı ter tógip, eki aınalymda ónim alýǵa daıyn. Al, ekinshi baǵyt – mal sharýashylyǵy boıynsha aýyldaǵy 216 aýla qamtylmaq. Jalpy 1054 úıdiń 614-inde maly joq desek, óńir basshysy maly bar úılerdiń de tórt túlikterin jobadaǵy shekke deıin kóterý boıynsha jumystar júrgizýdi tapsyrdy.
Sondaı-aq, okrýgte «Bastaý Jańaturmys» aýyl sharýashylyq kooperatıvi qurylǵan. Qurylym aýyl syrtyndaǵy jerlerdi tıimdi ıgerý, maldyń jem-shóbin ázirleý, tehnıkamen tapshylyǵyn sheshý, sapaly uryqpen qamtý, ónimdi ótkerý sekildi kóptegen máselelerdi sheshýmen aınalyspaq. Tipti, turǵyndarǵa eginshiliktiń tıimdi tásilderin meńgertip, baǵyt-baǵdar berý maqsatynda aýylda tájirıbeli agronom jumys jasamaq.
«Jobanyń naqty iske asatyn sáti týdy. Olaı deıtinimiz, Memleket basshysy qoldaý bildirgen pılottyq jobanyń bıýdjetin bekitý boıynsha keshe QR Úkimetiniń naqty sheshimi shyqty. Endi qaralyp otyrǵan 7,2 mıllıard teńgeni oblys boıynsha tańdalǵan on aýylda tıimdi ıgerý qajet. Bul jergilikti bılik pen aýyldyqtar úshin mereıli mindet, úlken syn bolǵaly tur», - dedi Asqar Myrzahmetov.
