Asqar Myrzahmetov tarazdyq turǵyndardyń talap-tilegine qulaq túrdi

TARAZ. QazAqparat – Taraz qalasyndaǵy qordalanǵan máselelerdi ýaqyt sozbaı sheshý úshin túbegeıli zerdeleý men júıeli jospar qajet. Bul týraly oblys ákimi, «Nur Otan» partııasy oblystyq fılıalynyń tóraǵasy Asqar Myrzahmetov partııanyń Taraz qalalyq fılıalynda ótkizgen qoǵamdyq qabyldaýynda basa aıtty, dep habarlaıdy QazAqparat tilshisi.

Aımaq basshysy qabyldaýǵa kelgen turǵyndardyń tilek-ótinishterine asa muqııat nazar aýdaryp, shahardaǵy jaryqtandyrý, tazalyq, kanal júıeleriniń máselelerin sheshý men baqylaýda ustaý boıynsha qala ákimine naqty tapsyrmalar joldady.

Qabyldaýǵa alǵash bolyp kirgen tarazdyq zeınetker Nazym Nurbaeva ózi turatyn Zavodskaıa kóshesiniń 2-burylysyn jaryqtandyrý máselesin kóterdi. Oblys ákimdiginiń energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov atalǵan kósheniń keler jyly tolyǵymen jaryqtandyrylatynyn jetkizdi. Óz kezeginde Asqar Isabekuly túgendeý barysynda qala boıynsha 700-den astam kóshe-burylystardyń anyqtalǵanyn, jalpy shahardaǵy 1500 kóshege zerdeleý uıymdastyryp, olardy tolyǵymen jaryqtandyrý sharalaryn ýaqyt sozbaı oryndaýdyń mańyzdylyǵyna toqtaldy. Ol úshin qala basshysy Aıtqazy Qaralabaevqa naqty mindetter júktep, eń aldymen turǵyndardyń asa alańdaýshylyǵyn týǵyzyp otyrǵan osyndaı túıindi túıtkilderdi ońynan tarqatýǵa kúsh salý kerektigin eskertti. Bul baǵyttaǵy jumystardy ońtaılandyrý arqyly az ýaqytta atqarýdyń joldaryn qarastyrý kerektigin aıtty.

Al, Qaldykúl Dosjanova qaladaǵy «Qarataý» shaǵyn aýdanyndaǵy №32 kópqabatty turǵyn úıdiń kúrdeli jóndeýden qashan ótetinin surady. Aımaq basshysy keler jyly shahardaǵy 80 úı jańǵyrtýdan ótetinin tilge tıek etip, atalǵan turǵyn úı de sol tizimde bar ekenin bildirdi. Atalǵan kópqabatty turǵyn úı mańyndaǵy aǵyn sý júıesiniń máselesine de aıryqsha kóńil bólgen oblys ákimi qaladaǵy barlyq sý júıeleriniń tazalyǵyn barlaý kerektigin tapsyryp, bul jumystardyń mańyzdylyǵyna nazar aýdartty.

Sondaı-aq, qabyldaýǵa kelgen kópbalaly ana Sháken Ahmetjanova óziniń 2010 jyldan beri turǵyn úı kezeginde turǵanyn aıtty. Búginde atalǵan tizimde ol 33-bolyp tur eken. Kópbalaly ana aǵymdaǵy jyl sońyna deıin birqatar tarazdyqtarmen birge qonys toıyn toılaıtynyn estip qýanyshyn jasyra almady. Oǵan jýyq arada arendalyq negizdegi páter kilti tabystalmaq.

Qabyldaýǵa jazylǵan ózge turǵyndar mektep oqýshylarynyń tasymaly, jumysqa ornalasý sekildi máselelerin kóterdi. Ol boıynsha tıisti tulǵalarǵa naqty hattamalyq tapsyrmalar júkteldi. Al, Talant Nurǵojaevtyń Tájik-Aýǵan shekarasynda qurban bolǵan bes jaýyngerge eskertkish ornatý usynysy da qoldaýǵa ıe boldy. Asqar Isabekuly atalǵan shekarada áskerı boryshyn ótegen 700-den astam jambyldyqtyń bar ekenin eskerip, atalǵan usynys eskerýsiz qalmaıtynyn, eskertkishti «Jeńis» parkinen ashý jumystary júrgiziletin jetkizdi.